Radiohead-ის გულშემატკივრებისთვის განსაკუთრებული სიახლე გვაქვს, რადგან ბენდმა, თითქმის 7-წლიანი პაუზის შემდეგ, ევროპის ტურნე დააანონსა.

ტურნე 20 კონცერტს მოიცავს, რომელიც სათავეს 2025 წლის 4 ნოემბერს ესპანეთში აიღებს და 12 დეკემბერს გერმანიაში ჩატარებული კონცერტით დასრულდება.

"გასულ წელს, საცდელად, რეპეტიციებისთვის შევიკრიბეთ. 7-წლიანი პაუზის შემდეგ, ძალიან სასიამოვნო შეგრძნება იყო ჩვენი სიმღერების ხელახლა შესრულება და მუსიკალურ იდენტობასთან დაბრუნება", — ვკითხულობთ ბენდის წევრების მიერ გაკეთებულ განცხადებაში — "და გაგვიჩნდა სურვილი, ჩაგვეტარებინა კონცერტები...ვიმედოვნებთ, მომავალში კიდევ შევხვდებით...ჯერჯერობით, მხოლოდ ეს თარიღები იქნება...მაგრამ ვინ იცის, სად მიგვიყვანს ეს ყოველივე".

გულშემატკივრებმა Radiohead-ის შესაძლო ტურნეზე სპეკულაცია ჯერ კიდევ გასული წლის მარტში დაიწყეს, მას შემდეგ, რაც ბენდის წევრებმა ახალი ბიზნესი — RHEUK25 LLP — ჩამოაყალიბეს. მათი ვარაუდით, ეს სახელწოდება იშიფრებოდა, როგორც Radiohead Europe UK 2025. უკვე სექტემბერში, ევროპის სხვადასხვა ქალაქებში, ფლაერები გამოჩნდა, რომლებშიც ლონდონისა და კოპენჰაგენის კონცერტები იყო ნახსენები.

ფოტო: Tom Sheehan

Radiohead-ის ხელახალი გაერთიანების შესახებ ინფორმაცია გულშემატკივრებისთვის გასაკვირი საერთოდ არ იყო, იმის გათვალისწინებით, რომ კოლინ გრინვუდმა (ბასგიტარა) გასული წლის სექტემბერში ჯგუფის შეკრების შესახებ ინფორმაცია გაავრცელა.

მომდევნო თვეში ბენდის ვოკალისტი Radiohead-ი შეკრების ვარაუდებს გამოეხმაურა. "ვფიქრობ, დავიმსახურეთ იმის უფლება, გავაკეთოთ ის, რაც ჩვენთვის ლოგიკურია, ყოველგვარი ახსნა-განმარტების", — განუცხადა იორკმა ავსტრალიის სამაუწყებლო კორპორაციას.

ბენდმა ბოლო კონცერტი 2018 წლის აგვისტოში, A Moon Shaped Pool-ს ტურნეს ფარგლებში გამართა. ტურნე მათი მეცხრე სტუდიური ალბომის გამოშვების შემდეგ დაიწყეს, სანამ ბენდი დროებით პაუზას აიღებდა და მისი წევრები დამოუკიდებლად გააგრძელებდნენ ახალ-ახალი პროექტების შექმნას.

ფოტო: Mondadori Portfolio / Getty Images

2019 წელს იორკმა თავისი სოლო ალბომი Anima გამოუშვა, ხოლო გასულ წელს ორი ჩანაწერი, ჯონი გრინვუდთან და ტომ სკინერთან ერთად. ამასობაში, ჯონი გრინვუდმა რამდენიმე სიმღერა დაწერა ფილმისთვის — Phantom Thread და Spencer. კოლინ გრინვუდი ნიკ ქეივთან ერთად ტურნეზე იმყოფებოდა, ო’ბრაიენმა თავისი სადებიუტო ალბომი, ხოლო სელვეიმ თავისი მესამე ალბომი — Strange Dance — 2023 წელს გამოუშვა.

შეგახსენებთ, რომ ბენდმა 2018 წელს კონცერტების ჩატარებისგან დიდხნიანი პაუზა აიღო, 7 წლის შემდეგ ეს Radiohead-ის პირველი საერთო ტურნე იქნება. რაც შეეხება ბილეთებს, მათ შეძენას 7 სექტემბრიდან, ბენდის ოფიციალური საიტიდან შეძლებთ.

ამავე თემაზე:

თუ მუსიკა შენი ცხოვრების განუყოფელი ნაწილია და ამ თემაზე მეტის გაგება გინდა, შემოგვიერთდი ჯგუფში ერთი სიმღერაც და...