რუსთაველის გამზირზე მიმდინარე საპროტესტო აქციაზე ადმინისტრაციული წესით დაკავებულების რაოდენობა 20-მდე გაიზარდა. ინფორმაციას NEWS.On.ge-ს შინაგან საქმეთა სამინისტროში დაუდასტურეს.

მანამდე უწყებამ ინფორმაცია აქციის 16 მონაწილის დაკავების შესახებ გაავრცელა. ამავე განცხადებაში შსს წერს, რომ აქციის მონაწილეები "არ დაემორჩილნენ პოლიციის კანონიერ მოთხოვნას".

"რუსთაველის გამზირზე მიმდინარე აქციასთან დაკავშირებით, საზოგადოებრივი წესრიგის დაცვის მიზნით მობილიზებულები არიან შინაგან საქმეთა სამინისტროს წარმომადგენლები.

შინაგან საქმეთა სამინისტროს თანამშრომლების არაერთი მოწოდების მიუხედავად, რომ აქციის მონაწილეებს არ შეეფერხებინათ საავტომობილო მოძრაობა, არ დაემორჩილნენ პოლიციის კანონიერ მოთხოვნას. აღნიშნულიდან გამომდინარე, პოლიციამ ადმინისტრაციულ სამართალდარღვევათა კოდექსის შესაბამისად 16 პირი დააკავა.

აქციის მონაწილეებს მოვუწოდებთ, შეწყვიტონ ტრანსპორტის სავალ ნაწილზე შეკრების მცდელობა და პროტესტი გამოხატონ კანონით დადგენილ ფარგლებში.

პოლიციის მხრიდან, თითოეულ სამართალდარღვევის ფაქტს შესაბამისი კანონიერი რეაგირება მოჰყვება," — წერია შსს-ის მიერ გავრცელებულ განცხადებაში.

პარლამენტთან შეკრებილები 2008 წლის აგვისტოს ომთან დაკავშირებულ საკითხზე დროებითი საგამოძიებო კომისიის დასკვნას აპროტესტებენ. ისინი სკანდირებდნენ: "წულუკიანი მონა", "კობახიძე მონა", "თავისუფლება რეჟიმის ტყვეებს". პოლიციამ აქციის მონაწილეებს პარლამენტის მიმდებარე ტერიტორია ძალის გამოყენებით დაატოვებინა, რის შემდეგაც მათ პარლამენტის წინ გადაინაცვლეს, სადაც შსს-ის განცხადებით, 20 პირი დააკავეს.