"კანონიერი ქურდის" ძმის, ლევან ჯანგველაძის მკვლელობის საქმეზე ბრალდებული გელა უძილაურის სასამართლო პროცესი დღეს გაიმართება. უცნობია დაარღვევს თუ არა დუმილს ბრალდებული — ის ამ დრომდე დუმილის უფლებას იყენებდა.

ჯანგველაძის ადვოკატმა, ტარიელ კაკაბაძემ "ტვ პირველთან" საუბრისას განაცხადა, რომ გამოკითხვის ოქმის მიხედვით, ბოლო პერიოდში მისი დაცვის ქვეშ მყოფს ნამდვილად ჰქონდა კონფლიქტი ოთარ ფარცხალაძესთან და ამ ფაქტით გამოძიება უნდა დაინტერესდეს.

"გამოკითხვის ოქმში წერია, რომ ლევან ჯანგველაძეს ნამდვილად ჰქონდა კონფლიქტი ბოლო პერიოდში ოთარ ფარცხალაძესთან და ჩემი, როგორც დაზარალებულის ადვოკატის მოთხოვნა არის, რომ ეს ინფორმაცია გადამოწმდეს, გამყარდეს სხვადასხვა მტკიცებულებებით და ის შეკითხვა, რომელიც არსებობს ოთარ ფარცხალაძესთან დაკავშირებით, არ დარჩეს პასუხგაუცემელი.

ფაქტია, რომ შსს-ს და სუს-ის უმოქმედობა რომ არა, გელა უძილაური ვერ მოკლავდა ლევან ჯანგველაძეს. მათ თვალი დახუჭეს და გელა უძილაურიც დარწმუნებული იყო იმაში, რომ მას არ დააკავებდნენ.

დღევანდელ პროცესზე განიხილება მტკიცებულებათა დასაშვებობის საკითხი, აღკვეთის ღონისძიების საკითხი გადაისინჯება და მოსამართლე გადაწყვეტს საქმის არსებითად გადაცემის საკითხს.

რაც შეეხება იმას, ბრალდებული გამოიყენებს თუ არა დუმილის უფლებას, ჯერჯერობით ამასთან დაკავშირებით ინფორმაცია არ მაქვს. როგორც ჩემთვის ცნობილია, ის აპირებს, გამოიყენოს დუმილის უფლება.მან აქამდე გამოიყენა დუმილის უფლება, მან აქამდე არ უპასუხა მნიშვნელოვან შეკითხვებს და ჯერჯერობით, როგორც ჩემთვის ცნობილია, მას არ უთანამშრომლია გამოძიებასთან. მომავალში რას გააკეთებს, ამის წინასწარ განჭვრეტა შეუძლებელია," — თქვა ტარიელ კაკაბაძემ.

ცნობისთვის, მკვლელობა 14 მარტს გვიან ღამით ვაკეში, ჭავჭავაძის გამზირზე მოხდა. მას შემდეგ, რაც ლევან ჯანგველაძე ახლობლის გასვენებიდან ბრუნდებოდა, გზის გადაკვეთისას გელა უძილაურმა მას ცეცხლი გაუხსნა. ბრმა ]ტყვიისგან გამვლელი ფეხში დაიჭრა. ამავე საქმეზე დანაშაულის იარაღის უკანონო გასაღების ბრალდებით სანდრო წივწივაძეა დაკავებულია.

მას ბრალად განზრახ მკვლელობისა და ცეცხლსასროლი იარაღის უკანონო შეძენა-შენახვა-ტარება ედებოდა. დანაშაული 15 წლამდე ვადით თავისუფლების აღკვეთას ითვალისწინებდა, თუმცა მოგვიანებით პროკურატურამ ბრალი განზრახ მკვლელობიდან შეკვეთით მკვლელობაზე გადააკვალიფიცირა.

2 ივნისს "ტვ პირველმა" გაავრცელა ინფორმაცია, რომ ანონიმური წყარო ლევან ჯანგველაძის მკვლელობის ორგანიზებაში საქართველოს ყოფილ მთავარ პროკურორს, ოთახ ფარცხალაძეს სდებს ბრალს.