შსს-მ 14 მარტს, გვიან ღამით ვაკეში, ჭავჭავაძის გამზირზე მომხდარი მკვლელობაში ბრალდებული, 1975 წელს დაბადებული გ.უ. 17 მარტს დააკავა. მას ბრალად განზრახ მკვლელობისა და ცეცხლსასროლი იარაღის უკანონო შეძენა-შენახვა-ტარება ედება.

"გამოძიებით დადგინდა, რომ ბრალდებულმა თბილისში, ჭავჭავაძის გამზირზე ორ პირს ცეცხლსასროლი იარაღიდან გასროლით რამდენიმე ჭრილობა მიაყენა და შემთხვევის ადგილიდან მიიმალა. მიყენებული დაზიანებების შედეგად,1964 წელს დაბადებული ლ.ჯ. ადგილზე დაიღუპა, ხოლო 1965 წელს დაბადებული გ.ჩ. სამედიცინო დაწესებულებაში გადაიყვანეს.

დანაშაული 15 წლამდე ვადით თავისუფლების აღკვეთას ითვალისწინებს", — ნათქვამია შსს-ს მიერ გავრცელებულ ინფორმაციაში.

ტვ პირველის და ფორმულას ცნობით, დაკავებული 58 წლის გელა უძილაური შსს-ს ყოფილი თანამშრომელია, მან უწყება 2021 წელს დატოვა. ის ამ წუთებში წინასწარი დაკავების იზოლატორში იმყოფება და ბრალის წარდგენის მოლოდინშია.

მკვლელობა 14 მარტს თბილისის ცენტრში მოხდა. მოკლულია კანონიერი ქურდის ძმა, ბიზნესმენი ლევან ჯანგველაძე. მკვლელობის მოტივი ამ დრომდე უცნობია.

ლევან ჯანგველაძის მკვლელობაში ბრალდებულის ადვოკატის, მარიამ ტაბატაძის განცხადებით, მისი დაცვის ქვეშ მყოფი დუმილის უფლებას იყენებს.

"ბრალდებულს შევხვდი. მასთან საპროცესო საგამოძიებო მოქმედებები მიმდინარეობს. ის გაოგნებულია. კონფიდენციალურად ვერ შევხვდით, რადგან დროებითი მოთავსების იზოლატორში შეასახლეს. ამასთან, ჯერ საქმის მასალებიც კი არ გადმოუციათ, რადგან პროცესშია გამოძიება. ბრალის წარდგენაც ხვალ იგეგმება. გამოკითხვით გამოჰკითხეს, ის მისთვის მინიჭებულ დუმილის უფლებას იყენებს.

რომელი მუხლით წარუდგენენ ბრალს, ხვალ იქნება ცნობილი. როდესაც საქმის მასალებს გადმომცემენ და გავეცნობი მას, უფრო დეტალურად შემეძლება კომუნიკაცია. ყველა საპროცესო საგამოძიებო მოქმედებაზე დათანხმდა, წინააღმდეგობა არ გაუწევია. რეალურად გაოგნებული იყო", — ადვოკატის კომენტარს IPN ავრცელებს.