"საქართველოს მოქალაქეებს, ვინც საზღვარგარეთ მუშაობენ, გაორმაგებულ და გასამმაგებულ ეკონომიკას ვთავაზობთ", — ასე გამოეხმაურა ოცნების ვიცესპიკერი ნინო წილოსანი ოცნების პრემიერის, ირაკლი კობახიძის განცხადებას იმის შესახებ, რომ "ვიზალიბერალიზაციას ერთი მინუსი აქვს, ეს არის მიგრაციის წახალისება".

"ჯანსაღი აზროვნება სჭირდება, რომ რაც თქვა ირაკლი კობახიძემ, სწორად გაიგო. ირაკლი კობახიძემ თქვა, რომ ვიზალიბერალიზაციამ, რა თქმა უნდა, გაამარტივა შრომითი მიგრაცია, რის შედეგადაც, თავისთავად გაიზარდა მიგრანტების რაოდენობა.

რაც შეეხება იმას, თუ რას ვთავაზობთ საქართველოს მოქალაქეებს, ვინც საზღვარგარეთ მუშაობენ, ეს არის გაორმაგებული და გასამმაგებული ეკონომიკა. 2012 წლის შემდგომ ქართული ეკონომიკა გასამმაგდა და ბოლო წლების მანძილზეც, განსხვავებით იმ ქვეყნებისგან, მათ შორის, ევროკავშირის ქვეყნებისგან, სადაც ჩვენი თანამოქალაქეები მუშაობენ, ჩვენი ეკონომიკა იზრდება ორნიშნა ციფრით, ხოლო ევროპის საშუალო ეკონომიკური ზრდა 0.5%-თან არის მიახლოებული. შესაბამისად, ვთავაზობთ იმას, რომ საკუთარ სამშობლოში მათ ექნებათ ყველანაირი ხელშეწყობა, რომ იშოვონ და იპოვონ ღირსეული სამუშაო და საკუთარი თავის რეალიზება მოახდინონ", — ამბობს ოცნების ვიცესპიკერი ნინო წილოსანი.

შეგახსენებთ, რომ გუშინ, ირაკლი კობახიძემ რუსთავი 2-ის ეთერში თქვა, რომ "ერთი მინუსი, რაც ვიზალიბერალიზაციას აქვს, ეს არის მიგრაციის წახალისება — ვიზალიბერალიზაციის არ არსებობის პირობებში, ბევრად მეტი ჩვენი მოქალაქე დარჩებოდა ქვეყანაშია".