"სუპერვოუქი" — არც თუ ისე შთამბეჭდავი ტერმინია, მეტიც ისეთივე უმნიშვნელოა, როგორც — Make America Great Again — მაგრამ რას ვიზამთ ეს არის მემარჯვენეების შესაძლებლობის მაქსიმუმი. სწორედ სუპერვოუქის იარლიყი მიაკრეს Fox News-ის შემფასებლებმა სუპერმენის ახალ ფილმს, მას შემდეგ, რაც რეჟისორმა ჯეიმს განმა ინტერვიუში მთავარი აქცენტი სუპერგმირის მიგრანტობაზე გააკეთა.

"სუპერმენი ამერიკის ისტორიას გვიყვება, მიგრანტი, რომელიც აქ სხვა ქვეყნიდან ჩამოვიდა და დამკვიდრდა", — თქვა განმა — "მაგრამ ჩემთვის ამ ამბის ქვაკუთხედი სიკეთის იდეაა, რომელიც ადამიანებმა დავკარგეთ"

კონსერვატორები სუპერმენის წინააღმდეგ

მემარჯვენე სახეები ფილმისა და მსახიობის შეურაცხყოფას არ მორიდებიან. "კინოთეატრში იმისთვის არ უნდა მივიდეთ, რომ ვიღაცამ დაგვმოძღვროს და თავისი იდეოლოგია თავს მოგვახვიოს" — თქვა კელიან კოვეიმ, ექსპერტმა და დონალდ ტრამპის ყოფილმა მრჩეველმა. "ალბათ სუპერმენს მოსასხამზე MS13 ექნება მიწერილი" — ირონიულად დასძინა კოვეისთან საუბარში გადაცემის წამყვანმა ჯის უოტერსმა. MS13 საერთაშორისო კრიმინალური დაჯგუფებაა, რომელსაც ამერიკის მიგრანტთა პოლიცია უპირისპირდება.

ცხადია ფილმის მიმართ ყველა ეს კომენტარი, რომლებსაც კოვეი და უოტერსი აკეთებენ, უადგილო და საღ აზრს მოკლებულია. მათთვის DCU-მ, სუპერმენის, ერთ დროს დიდებული გმირის სახე დაამახინჯა და აქცია პრო-ემიგრანტული იდეების აგიტატორად. ამ არგუმენტს მარტივად აქარწყლებს თავად სუპერმენის შექმნის ისტორია. პერსონაჟი ებრაელი მიგრანტების შვილებმა, ჯერი სიგელმა და ჯო შუსტერმა შექმნეს. სწორედ ამიტომ, ის ყოველთვის იყო ამერიკელი მიგრანტების სახე. სუპერმენი გულშემატკივარში ამერიკული ოცნების იდეებს აღვივებდა. ადამიანებს ამხნევებდა და ანიშნებდა, რომ ყველგან შეეძლოთ ეპოვათ უკეთესი ცხოვრება.

განის სუპერმენს განსაკუთრებული ამოცანა ჰქონდა. მას DCU-ს სამყარო წარსული შეცდომებისგან უნდა ეხსნა. ასეთ კრიტიკულ დროს კი სუპერმენი ყველაზე პოლიტიკური ფილმი გამოდგა, რაც კი ოდესმე სუპერგმირულ კინოში გვინახავს და თუ განის ერთი განცხადება საკმარისია იმისთვის, რომ კონსერვატორები ბოიკოტით დაიმუქრონ, ფილმი მათ მუქარებს ყოველ ნაბიჯზე უგულებელყოფს, რადგან ეს არის სუპერმენი, რომლის ნახვაც ჩვენს საზოგადოებას სჭირდებოდა. ჯეიმს განის სუპერმენი საუბრობს ემპათიაზე, ერთიანობასა და მშვიდობაზე და თუ ეს Fox News-სა და ულტრა მემარჯვენე კონსერვატორებს აბრაზებთ, მაშინ არც იმის გააზრება ესიამოვნებათ, რომ პერსონაჟი დონალდ ტრამპის მანკიერებებს ამხელს.

ასეთი პოლიტიკურად გაბედული სუპერგმირული ფილმი, ბნელი რაინდის შემდეგ, რომელმაც ბრწყინვალედ იწინასწარმეტყველა საერთაშორისო ტერორის გამოწვეული შიდა ხიდჩატეხილობა — ჩვენ არც გვინახავს. ბნელი რაინდის შემდეგ მარველმა ხელში ჩაიგდო მეინსტრიმული კინოს სადაავები. მიუხედავად იმისა, რომ შურისმაძიებლების სამყარომ ხარისხობრივად და მასშტაბურობით თამასა ძალიან მაღლა ასწია, მათი ფილმები რეალობის ასახვით ნაკლებად იყო დაინტერესებული. სუპერმენი კი ნამდვილად ეხმიანება რეალობას თავისი: კომიქსის სტილიზაციით, რომანტიკით, ბავშვურობითა და საბრძოლო სცენებით.

დევიდ კორენსვეტი კი ამ საუკუნის საუკეთესო სუპერმენია, რომლის თამაშიც ფილმის არსებულ ნაკლოვანებებს ფარავს. ახალ სუპერმენს მელანქოლიისთვის დრო არ აქვს, სამყარო დიდ საფრთხეშია და მას სასწრაფო შველა სჭირდება, სანამ განადგურებულა.

ცოტა რამ ფილმის შინაარსზე

განის ფილმი პირდაპირ მოვლენების ეპიცენტრში გვაგდებს, სადაც ვხედავთ სუპერმენის პირველ მარცხს. მას შემდეგ, რაც კლარკ კენტი ჯარჰანპურს ბორავიას მიერ სამხედრო ოკუპაციისგან იხსნის, ის ეჯახება ახალ ანტაგონისტს ბორავიას ჩაქუჩს. გაგიმხელთ და გეტყვით, რომ თავად ბორავიას ჩაქუჩი ნაკლებად მნიშვნელოვანია, აქ მთავარი ბოროტმოქმედი მისი შემქმნელი იარაღით მოვაჭრე მილიარდერი ლექს ლუთორია (ლუთორკორპის დამფუძნებელი). ლექსი სასოწარკვეთით ცდილობს თავდაცვის სამინისტროს ყურადღების მიპყრობას. მას სურს დაამტკიცოს, რომ სუპერმენის ჩარევა საერთაშორისო საქმეებში არაკონსტიტუციურია და რომ ის უბრალოდ უცხოპლანეტელია, რომელიც საგარეო პოლიტიკაში ერევა.

ფილმის განმავლობაში ძალაუფლების მქონე პერსონაჟები გამუდმებით მოიხსენიებენ სუპერმენს, როგორც "უცხოპლანეტელს". განი იყენებს კონსერვატორებისთვის საყვარელ ამ ტერმინის იმისთვის რომ შეგვახსენოს სუპერმენის იმიგრანტობა და ამავდროულად ხაზი გაუსვას იმ მიუღებლობას, რომელიც მის მიმართ აქვთ. სმოლვილში ტომ ველინგი აჟღერებს ფრაზას: "მე არალეგალი იმიგრანტი ვარ". ლექს ლუთორი გამწარებულია და ყველანაირად ცდილობს შიში დათესოს სუპერმენზე, მაშინ, როცა გმირი ადამიანებს მხოლოდ სიკეთეს უჩვენებს, ხდება ბავშვების და იმ კაცის მეგობარი, ვინც მის საყვარელ ჰალალის ურიკას მართავს. ეს ემპათია სუპერმენში მისმა მშობლებმა ჩანერგეს როცა, ჩვილი კრიპტონელი ხომალდით მოეშურებოდა დედამიწისკენ და მშობლების შეტყობინებას უსმენდა, რომლის მეორე ნაწილიც დაზიანებული აღმოჩნდება.

შინაარსზე ბევრს არ გავაგრძელებთ, თუმცა გეტყვით რომ ლექსი ფილმის დასაწყისიდან მალევე ხელში ჩაიგდებს სუპერმენის მშობლების შეტყობინებას, მას სრულად აღადგენს, რითაც აღმოჩნდება, რომ ჯორ ელი და ლარა ვონ ვანი (მშობლები), კალ ელს დედამიწის განადგურებას უქადაგებენ. ეს კი სწორედ ის აღმოჩნდება რაც ლუტორს სჭირდება, იმისათვის რომ სამყარო სუპერმენის წინააღმდეგ აამხედროს. ამის შემდეგ სუპერმენს, რომელიც სიკეთისთვის იბრძოდა — ციხეში გამოამწყვდევენ.

სუპერმენი და თანამედროვეობა

ფილმი ცდილობს ისაუბროს ამერიკის თანამედროვე პოლიტიკურ მდგომარეობაზე – ფლორიდის ციხეში გამომწყვდეული ადამიანები, რომლებსაც გაურკვეველი ვადით ამყოფებენ სატუსაღოში, სანამ მათი ემიგრანტობის სტატუსს დაადგენ. ოჯახებს მოწყვეტილი ხალხი, რომლიც შტატებში უბრალოდ უკეთესი ცხოვრების იმედად მიდიოდა. ამით ცხადია, რომ განი ცდილობს დაბადოს ადამიანურობა და თანაგრძნობა მაყურებელში. ბორავიას მმართველში შეიძლება დავინახოთ ბენიამინ ნეთანიანჰუს პროტოტიპიც. ლექს ლუტორი კი მომავალში ჯაჰარაპუნზე კონტროლის სანაცვლოდ, ბორავიას ფინანსურად გვერდში უდგას. ამაზე შეუძლებელია არ გაგვახსენდეს AI ვიდეო, რომელიც ღაზაზე ტრამპმა გამოაქვეყნა.

საბოლოოდ, სუპერმენი ლუტორს დაამარცხებს, ჯაჰარაპუნს გენოციდისგან იხსნის, ჰალალის კაცი კი მეტროპოლისის გმირად გამოცხადდება. რაც ალბათ ყველაზე ხმამაღალი განცხადებაა — მთავარ გმირად მუშათა კლასის ადამიანი აქციო. ეს ნიშნავს სოლიდარობა გამოუცხადო ყველა იმ ადამიანს, რომელიც თავის გულს და სულს დებს თავის რჩენასა და ქვეყნის ეკონომიკურად გაძლიერებაში. ეს ხალხი სხვებისთვისაც იბრძვის, მათთვისაც, ვისაც შეიძლება ეს არ დაუმსახურებია. მიუხედავად სუპერმენის მშობლების განზრახვისა, კრიპტონელმა მაინც სწორი მხარე აირჩია, ამ არჩევანის გაკეთება კი არასდროს არის გვიანი.

შეიძლება სუპერმენი მაინც ბლოკბასტერია და ამდენი ქება-დიდების მიუხედავად, ვერ იყოს პოლიტიკურად იმდენად ღრმა, როგორც სხვა ფილმები, თუმცა დასაფასებელია მეინსტრიმული კინოს სურვილი — აჩვენოს ის პრობლემები, რითაც დღეს კაცობრიობა იტანჯება. აჩვენოს დაყოფილი და დაქუცმაცებული, ერთმანეთზე გადამტერებული სამყარო. სუპერმენი შეაჩერებს გენოციდს, რომელშიც მსოფლიოს უმდიდრესი ადამიანები არიან ჩართულნი და მთავრობები ჯიბეში ჰყავთ. ემიგრანტი გმირია! ფილმში ონლაინ ტროლ-ბოტები მაიმუნების სახითაა გამოსახული. ჯეიმს განს არ ადარდებს, რომელ პროპაგანდისტ კონსერვატორს მოხვდება სუპერმენის ძლიერი მუშტი, ის ცდილობს იმ ხალხის გული გაათბოს, ვისაც ჯერ კიდევ შენარჩუნებული აქვს ჰუმანურობა. შეიძლება ეს ყველაფერი არ არის, თუმცა ეს დასაწყისია. პირველ სუპერმენს, კრისტოფერ რივსს სურდა, კინოინდუსტრიებს, თავიანთი ფილმებით, სამყაროს უკეთეს ადგილად ქცევის სურვილი გამოევლინათ, თუმცა მის სიცოცხლეში, სამწუხაროდ ამ მხრივ დიდი წარმატება ნამდვილად არ ჩანს ჰორიზონტზე, მაგრამ ჯეიმს განის სუპერმენი ყველაფრის ახალი დასაწყისია.