დაავადებათა კონტროლისა და საზოგადოებრივი ჯანმრთელობის ეროვნული ცენტრი ზაფხულის ცხელ დღეებთან დაკავშირებით მოსახლეობას სპეციალური რეკომენდაციებით მიმართავს.

უწყების ინფორმაციით, მაღალი ტემპერატურის პერიოდში სასურველია მოქალაქეებმა დღის ყველაზე ცხელ საათებში ქუჩაში გადაადგილებისგან თავი შეიკავონ. სპეციალისტები მოსახლეობას საკმარისი რაოდენობით წყლის მიღებისკენ მოუწოდებენ და ურჩევენ, მოერიდონ ალკოჰოლის, ტკბილი და კოფეინის შემცველი სასმელების მოხმარებას.

ამასთან, რეკომენდებულია მაღალინტენსიური ფიზიკური აქტივობისგან თავის შეკავება ან მისი გადატანა დილის საათებში — დღის შედარებით გრილ მონაკვეთში.

დაავადებათა კონტროლის ცენტრი აფრთხილებს მშობლებსა და შინაური ცხოველების პატრონებს, რომ დაუშვებელია ბავშვებისა და ცხოველების გაჩერებულ ავტომობილში დატოვება, რადგან მაღალი ტემპერატურა მათ ჯანმრთელობასა და სიცოცხლეს სერიოზულ საფრთხეს უქმნის.

ქუჩაში გასვლისას სპეციალისტები გვირჩევენ ღია ფერის, თავისუფალი და ნატურალური ქსოვილის ტანსაცმლის ტარებას, ასევე ქუდის, ქოლგისა და მზისგან დამცავი სათვალის გამოყენებას. საცხოვრებელ სივრცეში კი მნიშვნელოვანია სიგრილის შენარჩუნება, ხოლო ოთახების განიავება — ღამისა და დილის საათებში.

როგორც სპეციალისტები განმარტავენ, თბური ტალღები და მაღალი ტემპერატურა საზოგადოებრივი ჯანმრთელობისთვის ერთ-ერთ მთავარ გამოწვევად რჩება. კლიმატის ცვლილების ფონზე, საქართველოშიც იზრდება მაღალი ტემპერატურის ეპიზოდების სიხშირე და ხანგრძლივობა, რაც ტემპერატურისადმი მგრძნობიარე დაავადებების გავრცელებას, ასევე ქრონიკული არაგადამდები დაავადებების გამწვავებას უწყობს ხელს.