სომხეთის პრეზიდენტ ვაჰაგნ ხაჩატურიანის ბრძანებით, ნიკოლ ფაშინიანი სომხეთის რესპუბლიკის პრემიერმინისტრად დაინიშნა. როგორც Armenpress იუწყება, შესაბამისი ბრძანება სომხეთის რესპუბლიკის პრეზიდენტის ოფიციალურ ვებგვერდზე გამოქვეყნდა.

"კონსტიტუციის 149-ე მუხლის 1-ელი ნაწილის საფუძველზე, ნიკოლ ფაშინიანი დაინიშნოს პრემიერმინისტრად", — ნათქვამია ბრძანებაში.

Armenpress წერს, რომ 7 ივნისის საპარლამენტო არჩევნების შედეგად ფორმირებული პარლამენტის პირველი სესია სომხეთში 2 აგვისტოს დაიწყო. სომხეთის რესპუბლიკის კონსტიტუციის თანახმად, სომხეთის რესპუბლიკის მთავრობა ახლად არჩეული პარლამენტის პირველი სესიის დღეს უნდა გადადგეს. 2 აგვისტოს პრემიერმინისტრმა ნიკოლ ფაშინიანმა სომხეთის რესპუბლიკის პრეზიდენტს გადადგომის შესახებ განცხადება წარუდგინა, რომელიც შემდგომ პრეზიდენტის ადმინისტრაციას გადაეგზავნა.

პრეზიდენტმა ვაჰაგნ ხაჩატურიანმა მთავრობის გადადგომა დაამტკიცა. ამის შემდეგ, სომხეთის რესპუბლიკის კონსტიტუციის 149-ე მუხლის 1-ელი ნაწილის შესაბამისად, სომხეთის რესპუბლიკის პრეზიდენტს პრემიერმინისტრად უნდა დაენიშნა პარლამენტში უმრავლესობის მქონე პოლიტიკური პარტიის მიერ წარდგენილი კანდიდატი. პარლამენტში უმრავლესობის მფლობელმა პარტიამ "სამოქალაქო ხელშეკრულებამ" პრემიერმინისტრის პოსტზე ნიკოლ ფაშინიანის კანდიდატურა წარადგინა.