მოსკოვისა და სრულიად რუსეთის პატრიარქმა კირილემ განაცხადა, რომ საბჭოთა პერიოდში რუსული ატომური იარაღის შექმნა ღვთის წყალობა და წმინდა სერაფიმ საროველის ლოცვების შედეგი იყო.

ამის შესახებ მან 1-ელ აგვისტოს, წმინდა სერაფიმე საროველის ხსენების დღეს, ნიჟნი-ნოვგოროდის ოლქში მდებარე წმინდა სამების სერაფიმე-დივეევოს დედათა მონასტერში საღვთო ლიტურგიის აღსრულებისას ისაუბრა.

პატრიარქის განცხადებით, შემთხვევითი არ არის, რომ საბჭოთა მეცნიერებმა ბირთვული ბომბი სწორედ საროვში — იმ ადგილას შექმნეს, სადაც წმინდა სერაფიმე მოღვაწეობდა.

"მეცნიერებმა, რომლებიც აქ, საროვში მუშაობდნენ, შექმნეს ჩვენი რუსული ატომური ბომბი, რომელმაც ჩაშალა მტრის გეგმები ჩვენი სამშობლოს განადგურებისა და დამონების შესახებ. ამრიგად, მეცნიერების, ინჟინრებისა და მუშების შრომით, ღვთის მადლი და წყალობა მიენიჭა ჩვენს ქვეყანას", — განაცხადა რუსეთის ეკლესიის მეთაურმა.

მან აღნიშნა, რომ ესაუბრა ფიზიკოსებსა და მეცნიერებს, რომლებიც ქვეყნის უსაფრთხოებას უზრუნველყოფენ. პატრიარქის თქმით, თვითონ მეცნიერებსაც კარგად ესმით, რომ ამ კონკრეტულ ადგილას "მრისხანე იარაღის" შექმნა შემთხვევითობა არ ყოფილა და ეს წმინდანის მფარველობით მოხდა.

"თავმდაბალმა ბერმა, თავისი სიწმინდითა და ლოცვით, წვლილი შეიტანა ჩვენი ხალხისა და ჩვენი ქვეყნის არსებობის გაგრძელებაში", — დასძინა კირილემ.

ქადაგების დასასრულს რუსეთის პატრიარქმა მრევლს მოუწოდა, ილოცონ რუსეთის მართლმადიდებლური ხელისუფლებისთვის, პრეზიდენტ ვლადიმერ პუტინისა და არმიისთვის, რათა ღმერთმა ქვეყანა "ყოველი მტრისგან" დაიცვას.