ოცნების პარლამენტის დროებითი საგამოძიებო კომისიის მოთხოვნის შეუსრულებლობის ფაქტზე ბრალდებულ ლელო ძლიერი საქართველოს ლიდერს, მამუკა ხაზარაძეს 8 თვით პატიმრობა შეუფარდეს. მოსამართლე ზვიად შარაძის გადაწყვეტილებით, მას ასევე აეკრძალა თანამდებობის დაკავება 2 წლის ვადით. ბრალდებული განაჩენის გამოცხადებას არ დასწრებია.

მამუკა ხაზარაძის ადვოკატის, ზვიად კორძაძის თქმით, განაჩენი გასაჩივრდება სააპელაციო სასამართლოში.

"სამართლებრივად ამ გადაწყვეტილებას არანაირი საფუძველი არ აქვს. რაც შეეხება საერთოდ გამამტყუნებელ განაჩენს, არც, მითუმეტეს, პატიმრობას. მაშინ როცა ითვალისწინებდა სხვა სახის სარჩელსაც. ჩვენ დაველოდებით განაჩენის დასაბუთებულ ნაწილს და აუცილებლად გასაჩივრდება", — განაცხადა ზვიად კორძაძემ.

17:00 საათზე კი თბილისის საქალაქო სასამართლოში, პარლამენტის დროებითი საგამოძიებო კომისიის მოთხოვნის შეუსრულებლობის ფაქტზე ბრალდებულ ბადრი ჯაფარიძის სასამართლო პროცესი გაიმართება.

17 ივნისს ცნობილი გახდა, რომ ოცნების პარლამენტის დროებით საგამოძიებო კომისიაზე ლელო — ძლიერი საქართველოს ერთ-ერთი ლიდერი, მამუკა ხაზარაძე მეორედ დაიბარეს. ხაზარაძეს გამოქვეყნებულ დოკუმენტში ვკითხულობთ, რომ ოპოზიციონერ ლიდერს "2012-2025 წლებში საქართველოს საგარეო პოლიტიკური მიზნების საზიანოდ განხორციელებული ქმედებებზე" ახსნა-განმარტების მიცემისთვის იბარებენ. ის კომისიაზე მეორედ აღარ გამოცხადდა.

შეგახსენებთ, რომ ოპოზიციონერი ლიდერს კომისიაზე გამოუცხადებლობისთვის 50 000-ლარიანი გირაო დაეკისრა, რომელიც გადაიხადა.

მამუკა ხაზარაძეს ბრალი სისხლის სამართლის კოდექსის 349-ე მუხლით ჰქონდა წარდგენილი, რაც "საქართველოს პარლამენტის დროებითი საგამოძიებო კომისიის მოთხოვნის შეუსრულებლობას" გულისხმობს, აღნიშნული ისჯება ჯარიმით, ან თავისუფლების აღკვეთით ვადით ერთ წლამდე, თანამდებობის დაკავების ან საქმიანობის უფლების ჩამორთმევით ვადით სამ წლამდე.