წულუკიანის საგამოძიებო კომისია ოცნების პარლამენტს სამუშაო ვადის კიდევ ერთი თვით გაგრძელების მოთხოვნით მიმართავს

ოცნების პარლამენტის დროებითი საგამოძიებო კომისიის ხელმძღვანელმა, თეა წულუკიანმა განაცხადა, რომ ოცნების პარლამენტის ბიუროს 20 ან 23 ივნისამდე კომისიის უფლებამოსილების ერთი თვით გაგრძელების თაობაზე მიმართავს.

"კანონმდებლობით გვაქვს უფლება, რომ ვიმუშაოთ 6 თვე, მეტი არა, შეგვიძლია ვიმუშაოთ ნაკლები, მაგრამ არაუმეტეს 6 თვისა. ჩვენ უკვე მე-5 თვეა ვმუშაობთ ამ რეჟიმში და ჩვენი საქმიანობის ეს არის მხოლოდ ხილული ნაწილი. ის, რასაც საზოგადოება ვერ ხედავს, სამუშაო პროცესია და ამიტომ არ არის საჯარო, არის ადმინისტრაციულ პერსონალთან ყოველდღიური მუშაობა წერილების განხილვა და დასკვნის პროექტის წერა. ამიტომ, ჩვენ ვიფიქრეთ და დღეს კენჭისყრისთვის გთავაზობთ ასეთ საკითხს - ვითხოვოთ ბოლო, მე-6 თვით ჩვენი უფლებამოსილების გაგრძელება, მაგრამ ისიც ვილაპარაკეთ და საზოგადოებასაც უნდა ვუთხრათ, რომ ივლისის თვეში ამ ტიპის საჯარო სხდომები ვეღარ იქნება ხშირი იმიტომ, რომ ჩვენი მთელი რესურსი დასკვნის პროექტს უნდა დავუთმოთ. გარდა გამონაკლისის შემთხვევებისა, ჩვენ ასეთი სხდომა აღარ გვექნება, თუმცა ის სხდომები, რომელიც გულისხმობს სამი წევრის მიერ - კომისიის სამი წევრი ვიკრიბებით და ვატარებთ გამოკითხვებს, ასეთი ფორმატები ივლისში შესაძლოა გაგრძელდეს. გთავაზობთ იმასაც, რომ აგვისტოს პირველ დღეებში, სავარაუდოდ, 4 აგვისტოს, მაგრამ შეიძლება მანამდეც, არაუგვიანეს 4 აგვისტოსი, ჩვენ შევიკრიბოთ ამ დარბაზში და დავამტკიცოთ კომისიის დასკვნა, რომელიც შემდეგ სექტემბრის პირველ რიცხვებში წარედგინება საქართველოს პარლამენტის პლენარულ სხდომას", — განაცხადა თეა წულუკიანმა.

2003-2012 წლებში მოქმედი ხელისუფლებისა და პოლიტიკური თანამდებობის პირების საქმიანობის შემსწავლელი დროებითი საგამოძიებო კომისია თებერვალში შეიქმნა და მისი უფლებამოსილების ვადა სამი თვით განისაზღვრა.

1-ელ აპრილს ოცნების პარლამენტმა 86 ხმით მხარი დაუჭირა დადგენილების პროექტს, რომლითაც ენმ-ს ხელისუფლების საქმიანობის შემსწავლელ დროებით საგამოძიებო კომისიას მანდატი გაუზარდეს და სახელიც შეუცვალეს

უფრო კონკრეტულად — ოცნების პარლამენტის პლენარულ სხდომაზე, 86 ხმით მხარი დაუჭირეს დადგენილების პროექტს "2003-2012 წლებში მოქმედი რეჟიმისა და რეჟიმის პოლიტიკური თანამდებობის პირების საქმიანობის შემსწავლელი საქართველოს პარლამენტის დროებითი საგამოძიებო კომისიის შექმნის შესახებ" პარლამენტის 2025 წლის დადგენილებაში ცვლილების შეტანის თაობაზე.

დადგენილებაში ცვლილების შემდეგ, დროებითი საგამოძიებო კომისია შემდეგი სახელწოდებით იფუნქციონირებს: "2003–2012 წლებში მოქმედი რეჟიმის, ამ რეჟიმის პოლიტიკური თანამდებობის პირებისა და პოლიტიკურ პარტიებში გაერთიანებული მოქმედი და ყოფილი თანამდებობის პირების 2003 წლიდან დღემდე საქმიანობის შემსწავლელი საქართველოს პარლამენტის დროებითი საგამოძიებო კომისია".

მიმდინარე წლის 10 აპრილს საგამოძიებო კომისიამ, პარლამენტს მუშაობის ვადის 1 თვით, 5 ივნისამდე გახანგრძლივება ითხოვა.

19 მარტს ოცნების პარლამენტის დროებითი საგამოძიებო კომისიის საქმიანობასთან და უფლებამოსილებებთან დაკავშირებულ წესებში ცვლილებები განხორციელდა. ცვლილებების პროექტის მიხედვით, თუკი იარსებებს გონივრული ეჭვი, რომ ჩადენილია დანაშაულებრივი ქმედება, საგამოძიებო კომისიას, საქმიანობის ნებისმიერ ეტაპზე, შეეძლება შესაბამისი ორგანოს წინაშე გამოძიების დაწყების საკითხი დასვას.

შეგახსენებთ, რომ წულუკიანის კომისიაზე გამოუცხადებლობის გამო დაკისრებული გირაოს გადაუხდელობის გამო დაკავებული არიან კოალიცია ცვლილებებისთვის ლიდერები ნიკა გვარამია, ნიკა მელია, ზურაბ გირჩი ჯაფარიძე და ყოფილი თავდაცვის მინისტრი ირაკლი ოქრუაშვილი; დაკისრებული გირაო გადაიხადეს დროას ლიდერებმა მამუკა ხაზარაძემ და ბადრი ჯაფარიძემ და სტრატეგია აღმაშენებლის ლიდერმა გიორგი ვაშაძემ. საგამოძიებო კომისიაზე გამოცხადდა პარტია გახარია საქართველოსთვის ლიდერი გიორგი გახარია, თუმცა თეა წულუკიანმა ის ამ კომისიაზე მეორედაც დაიბარა. ამ დრომდე უცნობია აპირებს თუ არა გახარია ამ კომისიაზე მისვლას.

მეტი წულუკიანის კომისიის შესახებ: