"აღსრულდა ნება ერის დიადი საქართველოსი!!! გამიუქმდა საქართველოს პირადობა და პასპორტი! გასაჩივრებული მაქვს სასამართლოში, მაგრამ დრო თუ არ გაწელეს და თან არ გაწამეს ქართველობას ხომ ვერ შეინარჩუნებენ!", — წერს მოქალაქე ლაშა გაბიტაშვილი.

19 მაისს ლაშა გაბიტაშვილმა გაავრცელა ინფორმაცია, რომ იუსტიციის სახლმა მას საქართველოს მოქალაქეობა გაუუქმა. გაბიტაშვილის თქმით, მას ქორწინებიდან ისრაელის მოქალაქეობა აქვს, რის შემდეგაც მიმართა იუსტიციის სახლს, რომ შენარჩუნებოდა საქართველოს მოქალაქეობაც, თუმცა უარი მიიღო.

"მინდა გაგიზიაროთ ქართული ოცნების მორიგი ბოროტი გადაწყვეტილება — მათ წამართვეს საქართველოს მოქალაქეობა, მიუხედავად იმისა, რომ საქართველოში დავიბადე, გავიზარდე, მთელი ცხოვრება საქართველოში ვცხოვრობ და ვმოღვაწეობ. იუსტიციის სახლმა მიიღო გადაწყვეტილება, რომ აღარ გამიგრძელდეს საქართველოს მოქალაქეობა.

მე ისრაელის მოქალაქეობა მაქვს, რომელიც ჩემი ცოლის მხრიდან მივიღე ქორწინებით და ამის შემდეგ, იუსტიციის სახლს მივმართე, რომ შენარჩუნება მომხდარიყო ჩემი მოქალაქეობის. მე უარი არ განმიცხადებია საქართველოს მოქალაქეობაზე და პირიქით, განვაცხადე, რომ მინდა შენარჩუნება, მაგრამ სამწუხაროდ, უარი მითხრეს და წამართვეს მოქალაქეობა. აუცილებლად გავასაჩივრებ და ბოლომდე ვიბრძოლებ, იმისთვის, რომ დავიბრუნო საქართველოს მოქალაქეობა. ისინი ვერ წამართმევენ სამშობლოს," — აცხადებს ლაშა გაბიტაშვილი.

შეგახსენებთ, 2025 წლის იანვარში აბუ-დაბიში ლაშა გაბიტაშვილსა და ქართული ოცნების დეპუტატებს ირაკლი ზარქუა და ვიქტორ სანიკიძეშ შორის ფიზიკური დაპირისპირება მოხდა. ინციდენტის შემდეგ, გაბიტაშვილი და დეპუტატები ადგილობრივმა პოლიციამ გამოკითხვაზე გადაიყვანა. ირაკლი ზარქუას განცხადებით, ჯარიმის გადახდის შემდეგ მათ აბუ-დაბის დატოვების საშუალება მიეცათ.

გაბიტაშვილს ფიზიკურად მეორეჯერაც გაუსწორდნენ, ამ შემთხვევაში მას თბილისში საცხოვრებელ სახლთან დაესხნენ თავს. ამ თავდასხმას ლაშა გაბიტაშვილი აბუ-დაბის ინციდენტს უკავშირებდა.