სამმა ნიღბიანმა მოქალაქე ლაშა გაბიტაშვილი ძაღლის სეირნობისას სცემა. მისი თქმით შემთხვევა დაახლოებით დილის 9 საათზე მოხდა. ლაივ-ჩართვაში ლაშა გაბიტაშვილს სახეზე სისხლის კვალიც ეტყობა და ამბობს, რომ თავდასხმა აბუ-დაბის ინციდენტს უკავშირდება, როცა მას ქართული ოცნების პარლამენტის წევრები: ირაკლი ზარქუა, ვიქტორ სანიკიძე და გელა სამხარაული დაესხნენ თავს, რის გამოც ოთხივე მათგანი აბუ-დაბის იზოლატორში აღმოჩნდა და, სავარაუდოდ, ჯარიმის შემდეგ გათავისუფლდნენ.

"ახლა "აჩოტს" მისცემენ, ვცემეთო. სასაცილოა, რომ იმის შემდეგ 3 კაცი უნდა მომვარდეს და ეს დამმართოს. იქ არ იყვნენ თუ რამე უნდოდათ? ღმერთმა შეარგოთ ასეთი ცხოვრება", — ამბობს გაბიტაშვილი მის მიერ გავრცელებულ ლაივ-ჩართავში.

გაბიტაშვილი ამბობს, რომ ამით ვერ შეაშინებენ და დროა ახალი არჩევნები ჩაინიშნოს და დაკავებულები გაათავისუფლონ.

"თავს დამესხა სამი ნიღბიანი. ვერავის ვერ შეაშინებთ. დროა, ახალი არჩევნები ჩაინიშნოს და ის ხალხი ვინც ციხეშია გამოუშვათ. მცემენ, მიმარტყამენ, მომარტყამენ, არავის ეშინია. ჩვენ აქ ვცხოვრობთ და ვიცხოვრებთ. ეგ ხალხი კი გაიქცევიან. საღოლ, მაგრად მოაწყვეთ, დილის 9 საათზე რომ მიყურებთ აქ ძაღლს რომ ვასეირნებ და რომ უნდა მომვარდეთ და მცემოთ... აუცილებლად ჩვენ ჩვენსას მივაღწევთ. არ ვიცი ვინ იყვნენ. 3 კაცი მომვარდა ნიღბებით. მერე წავიდნენ. ეგ არაფერი... ახლა გამოვიძახებ პოლიციას, ამ ყველაფერს აღვწერთ და მივყვები თავის გზაზე როგორც საჭიროა. ასეთი ხალხია. როცა წყნარად ძაღლს ვასეირნებ, მოვარდნენ. ბოღმიანები არიან, შურიანები და უსამართლო ხალხი. არაფერი არ მჭირს, კარგად ვგრძნობ თავს", — ამბობს ლაშა გაბიტაშვილი (სტილი დაცულია).

შეგახსენებთ, რომ 13 იანვარს, აბუ-დაბიში, ქართული ოცნების დეპუტატები ირაკლი ზარქუა, ვიქტორ სანიკიძე და გელა სამხარაული მოქალაქე ლაშა გაბიტაშვილს ფიზიკურად დაუპირისპირდნენ.