საქართველოს სახალხო დამცველის შესახებ ორგანული კანონის მოთხოვნათა შეუსრულებლობისათვის #3 პენიტენციური დაწესებულების დირექტორს სახდელის სახით 800 ლარის ოდენობით ჯარიმა დაეკისრა. 14 სექტემბერს, ის ბათუმის საქალაქო სასამართლომ სამართალდამრღვევად სცნო.

ბათუმის საქალაქო სასამართლოს დადგენილების თანახმად, სახალხო დამცველის აპარატის მიერ მოთხოვნილი ინფორმაცია არ განეკუთვნება ნასამართლობასთან დაკავშირებულ მონაცემებს და შესაბამისად, პენიტენციური დეპარტამენტის #3 პენიტენციური დაწესებულების დირექტორი ვალდებული იყო სახალხო დამცველის აპარატისათვის მიეწოდებინა სათანადო ინფორმაცია.

როგორც სახალხო დამცველის განცხადებაში წერია, აპარატიდან ციხის დირექტორს წერილი გაუგზავნეს ერთ-ერთი მსჯავრდებულის განცხადებაში მითითებული საკითის შესწავლისათვის საჭირო ინფორმაციის გამოთხოვის მიზნით.

კერძოდ, მათივე ცნობით, მსჯავრდებული მიუთითებდა, რომ პირობით ვადამდე ადრე გათავისუფლებაზე დასავლეთ საქართველოს ადგილობრივი საბჭოს უარის გასაჩივრების მიზნით 2017 წლის 23 იანვრის საჩივრით მიმართა თბილისის საქალაქო სასამართლოს.

ომბუდსმენის ინფორმაციით, საჩივარი ჩაბარდა N3 პენიტენციურ დაწესებულების ადმინისტრაციას, თუმცა თბილისის საქალაქო სასამართლოს აღნიშნული საჩივარი არ მიუღია.

საკითხის შესწავლის მიზნით, #3 პენიტენციური დაწესებულების დირექტორს სთხოვეს სახალხო დამცველის აპარატისათვის მოეწოდებინა ინფორმაცია ჩაბარდა თუ არა თბილისის საქალაქო სასამართლოს მსჯავრდებულის 2017 წლის 23 იანვარის საჩივარი გადაწყევტილების მიზეზები.

ომბუდსმენი აცხადებს, რომ პენიტენციური დაწესებულების დირექტორის წერილის თანახმად, პერსონალურ მონაცემთა დაცვის შესახებ" საქართველოს კანონის შესაბამისად, ნასამართლობასთან დაკავშირებული ინფორმაცია განსაკუთრებული კატეგორიის პერსონალური მონაცემებია და სახალხო დამცველის აპარატს მსჯავრდებულის თანხმობა ესაჭიროებოდა.

საქართველოს სახალხო დამცველის შესახებ“ საქართველოს ორგანული კანონის 23-ე მუხლის პირველი პუნქტის თანახმად, "ყველა სახელმწიფო ხელისუფლების და ადგილობრივი თვითმმართველობის ორგანო, თანამდებობის თუ იურიდიული პირი ვალდებულია ყოველმხრივ დაეხმაროს საქართველოს სახალხო დამცველს, დაუყოვნებლივ წარუდგინოს მასალები, საბუთები და სხვა ინფორმაცია, რომელიც ესაჭიროება საქართველოს სახალხო დამცველს თავისი უფლებამოსილების განსახორციელებლად."