ოცნების ხელისუფლების მთავრობამ სახელმწიფო გრანტის მართვის სააგენტოს 2025 წლის ბიუჯეტის, საშტატო ნუსხისა და სახელფასო ფონდის შეთანხმების თაობაზე განკარგულება გამოსცა. დოკუმენტი 13 მაისითაა დათარიღებული და მას ხელს ირაკლი კობახიძე აწერს.

ოცნების პრემიერის განკარგულებით, სახელმწიფო გრანტის მართვის სააგენტოს 2025 წლის ბიუჯეტი, რომელიც 8 თვეს მოიცავს, 510 200 ლარია, აქედან 253 200 ლარი შრომის ანაზღაურებაა.

დოკუმენტის მიხედვით, სახელმწიფო გრანტის მართვის სააგენტოს თავმჯდომარის, თამარ ზოდელავას ხელფასი 10 585 ლარია, თავმჯდომარის მოადგილის — 8760 ლარი, დეპარტამენტის უფროსისა — 7 300 ლარი.

საგულისხმოა, რომ საქსტატის მონაცემებით, 2024 წლის მონაცემებით, საშუალო ხელფასი 2060 ლარამდეა.

შეგახსენებთ, რომ ოცნების პრემიერის 23 აპრილით დათარიღებული ბრძანებით სახელმწიფო გრანტის მართვის სააგენტოს თავმჯდომარე თამარ ზოდელავა გახდა. აღნიშნულ სააგენტოს არასამთავრობო ორგანიზაციებზე გრანტების გაცემის შესაძლებლობა ექნება.

ოცნებამ გრანტების კანონში ცვლილების შეტანას III მოსმენით, 16 აპრილს დაუჭირა მხარა,

ოცნების ხელისუფლების პარლამენტმა "მოქალაქეთა პოლიტიკური გაერთიანებების შესახებ" საქართველოს ორგანულ კანონში ცვლილებები დაჩქარებული წესით, 2 დღეში განიხილა და მესამე მოსმენით, 80 ხმით მხარი დაუჭირა.

ქართული ოცნების საკანონმდებლო ინიციატივა სხდომაზე ფრაქცია ქართული ოცნების თავმჯდომარის პირველმა მოადგილემ ირაკლი კირცხალიამ წარადგინა.

საკანონმდებლო ცვლილების მიხედვით, აკრძალული გრანტის გაცემისა და მიღების მონიტორინგს ანტიკორუფციული ბიურო განახორციელებს.

კანონპროექტის მიხედვით, სახელმწიფო გრანტის მართვის სააგენტოში დაახლოებით 10 პირი დასაქმდება. მთავრობის ადმინისტრაციის მიერ მომზადებული კანონპროექტით წელს გრანტების სააგენტოს ბიუჯეტი 20 მლნ ლარი იქნება. სააგენტოს დაფინანსების წყაროა სახელმწიფო ბიუჯეტი.

მეტი გრანტების კანონში ცვლილების შესახებ: