ქართული ოცნების დეპუტატი ლევან მაჭავარიანი აცხადებს, რომ მთავრობა დონორ ორგანიზაციას არ მისცემს ნებართვას ნინო ლომჯარიაზე, ეკა გიგაურზე ან ბაია პატარაიაზე "მორიგი რევოლუციური სცენარისთვის" გასცენ გრანტი.

მაჭავარიანმა ასევე დასძინა, რომ კონკრეტული დონორი ორგანიზაცია თუ "ვერ დაარწმუნებს მთავრობას", რომ ეს საქმე მოსახლეობისთვის კარგია და ეს თანხა "ლომჯარიას, გიგაურს, ქალბატონ პატარაიას" არ მოხმარდება, ამ შემთხვევაში გრანტები დადასტურდება.

"როდესაც კონკრეტული დონორი ორგანიზაცია მიმართავს მთავრობას ამა თუ იმ გრანტის გაცემასთან დაკავშირებით, თუ მთავრობას დაარწმუნებს, რომ ეს საქმეს წაადგება ჩვენი ქვეყნისთვის, ჩვენი მოსახლეობისთვის კარგი იქნება, რა თქმა უნდა, ამას მოჰყვება მთავრობის მხრიდან ვიზირება. ხოლო თუ ვერ დაარწმუნებს მთავრობას და ჩვენ დავინახავთ ნიშნებს, რომ ეს თანხა უნდა მოხმარდეს ლომჯარიას, გიგაურს, ქალბატონ პატარაიას და ა.შ. იმისთვის, რომ მორიგი რევოლუციური სცენარი მოაწყონ, რა თქმა უნდა, ამაზე ვიზირება არ იქნება. თუ მაინც გასცემს დონორი ორგანიზაცია ქალბატონ ლომჯარიაზე ამ თანხას, ქალბატონი ლომჯარია დაჯარიმდება ამ თანხის ორმაგი ოდენობით", — განაცხადა ლევან მაჭავარიანმა.

ოცნების დეპუტატმა ასევე განაცხადა, რომ "კოლექტიური გიგაურები და ლომჯარიები" "არასასურველ ორგანიზაციებს" განეკუთვნებიან.

"კი ბატონო, ისინი არასასურველები არიან და ასეთ ორგანიზაციებს არ უნდა მიეცეს საშუალება, რომ დააფინანსონ რევოლუციები ჩვენს ქვეყანაში", — დასძინა მაჭავარიანმა.

შეგახსენებთ, "გრანტების შესახებ" კანონში დაგეგმილი ცვლილებებით, უცხოური გრანტის მიღებას მთავრობის ან მთავრობის მიერ განსაზღვრული უფლებამოსილი პირის თანხმობა დასჭირდება, გრანტის გაცემისა და მიღების მონიტორინგს კი ანტიკორუფციული ბიურო განახორციელებს.