შინაგან საქმეთა სამინისტრო განცხადებას ავრცელებს, სადაც წერია, რომ ოცნების ხელისუფლების შს მინისტრის მოადგილე, ალექსანდრე დარახველიძე, საქართველოში ოფიციალური ვიზიტით მყოფ ევროპის საბჭოს ადამიანის უფლებათა კომისარს, მაიკ ოფლაერტს შეხვდა.

"შინაგან საქმეთა მინისტრის მოადგილე, ალექსანდრე დარახველიძე საქართველოში ოფიციალური ვიზიტით მყოფ ევროპის საბჭოს ადამიანის უფლებათა კომისარს — მაიკლ ოფლაერტს შეხვდა.

შეხვედრის ფარგლებში მხარეებმა განიხილეს ბოლო თვეების განმავლობაში გამართული საპროტესტო აქციების მიმდინარეობა.

ალექსანდრე დარახველიძემ ევროპის საბჭოს ადამიანის უფლებათა კომისარს მიაწოდა დეტალური ინფორმაცია, როგორც აქციის ძალადობრივი მონაწილეების მიერ განხორციელებული კანონსაწინააღმდეგო ქმედებების, ასევე იმ ქმედითი ღონისძიებების შესახებ, რომლებიც საპასუხოდ იქნა გატარებული პოლიციის მიერ.

შეხვედრის ფარგლებში ასევე განხილულ იქნა ბოლო პერიოდში განხორციელებული საკანონმდებლო ცვლილებები და მათი შესაბამისობა საერთაშორისო სტანდარტებთან.

შეხვედრის დასასრულს, ალექსანდრე დარახველიძემ მაიკლ ოფლაერტს მადლობა გადაუხადა და აღნიშნა, რომ საქართველოსთვის მნიშვნელოვანი და პრიორიტეტულია ევროპის საბჭოს ინსტიტუტებთან თანამშრომლობა. მხარეებმა სამომავლო თანამშრომლობის გაღრმავებისა და ინფორმაციის გაზიარების მიმართულებით მზაობა გამოხატეს", — წერია შსს-ს განცხადებაში.

შეგახსენებთ, 2024 წლის 19 დეკემბერს დიდმა ბრიტანეთმა პოლიციის მაღალჩინოსნები, მათ შორის შს მინისტრი ვახტანგ გომელაური და კიდევ 4 პირი — შს მინისტრის მოადგილე ალექსანდრე დარახველიძე, თბილისის პოლიციის დეპარტამენტის უფროსი სულხან თამაზაშვილი, განსაკუთრებულ დავალებათა დეპარტამენტის უფროსი ზვიად ხარაზიშვილი ("ხარება") და მისი მოადგილე მილერი ლაგაზაური დაასანქცირა.

იმავე დღეს, აშშ-მა შინაგან საქმეთა მინისტრი ვახტანგ გომელაური და განსაკუთრებულ დავალებათა დეპარტამენტის უფროს ზვიად ხარაზიშვილის ("ხარებას") მოადგილე მირზა კეზევაძე მაგნიცკის სიაში შეიყვანა.