სახელმწიფო უსაფრთხოების სამსახურის ინფორმაციით, შესაბამისი დანაყოფები მუშაობენ ცრუ შეტყობინების ფაქტზე, რომელიც თბილისის სამ სავაჭრო ცენტრში ბომბის არსებობის საფრთხეს ეხება.

უწყება ცრუ შეტყობინებაში აშშ-ის საელჩოს განცხადებას გულისხმობს. განცხადებაში საელჩო მოქალაქეებს თბილისის 3 სავაჭრო ცენტრში ბომბის არსებობის საფრთხის შესახებ აფრთხილებს.

"სახელმწიფო უსაფრთხოების სამსახურის შესაბამისი დანაყოფები მუშაობენ მორიგ ცრუ შეტყობინებაზე.

მოქალაქეთა უსაფრთხოება სამსახურის უმთავრესი პრიორიტეტია და საკუთარი უფლებამოსილების ფარგლებში სამსახური ყველა საჭირო და გადაუდებელ ღონისძიებას ახორციელებს.

მოვუწოდებთ საქართველოში აკრედიტებული დიპლომატიური კორპუსის წარმომდგენლებს, პატივი სცენ უსაფრთხოებაზე პასუხისმგებელი სამსახურების საქმიანობას, გამოიჩინონ მეტი პასუხისმგებლობა და თავი შეიკავონ შესაბამის უწყებებთან შეუთანხმებელი განცხადებების გავრცელებისგან", — ნათქვამია უწყების მიერ გავრცელებულ განცხადებაში.