დირიჟორი, კომპოზიტორი და მუსიკოსი ვახტანგ მაჭავარიანი 74 წლის ასაკში გარდაიცვალა. ინფორმაციას სოციალურ ქსელში მისი შვილი ალექსი მაჭავარიანი ავრცელებს.

"ღრმა სინანულით ვწერ, რომ წუხელ გარდაიცვალა მამაჩემი," — წერს ალექსი მაჭავარიანი.

ვახტანგ მაჭავარიანი 1984–1990 წლებში თანამშრომლობდა სანქტ-პეტერბურგის მარინის თეატრთან. იქვე იყო ა. მაჭავარიანის ბალეტ "ვეფხისტყაოსნის" დამდგმელი დირიჟორი. ამავე პერიოდში თანამშრომლობდა მოსკოვის დიდ თეატრთან და ევროპის საოპერო დასებთან.

1987 წელს იყო საქართველოს მუსიკალური საზოგადოების კამერული ორკესტრის მთავარი დირიჟორი.

1990 წელს დააფუძნა "მარინისა" და დიდი თეატრების, სანქტ-პეტერბურგისა და მოსკოვის ფილარმონიების, ბალტიისპირეთის ქვეყნების, საქართველოსა და უკრაინის წამყვანი ორკესტრების 120 მუსიკოსისაგან შემდგარი საფესტივალო ორკესტრი, რომლის მთავარი დირიჟორი და სამხატვრო ხელმძღვანელი თავადვე იყო.

1996 წლიდან იყო ე. მიქელაძის სახელობის საქართველოს სახელმწიფო სიმფონიური ორკესტრის მთავარი დირიჟორი, 1998–2004 წლებში მისი სამხატვრო ხელმძღვანელი. 2000–2008 წლებში მან რუსეთში დააარსა და ხელმძღვანელობდა დიდ სიმფონიურ ორკესტრ "მილენიუმს".

მისი ინიციატივითა და დირიჟორობით საქართველოში გაიმართა არაერთი პრემიერა: ჯ. ვერდის "ფალსტაფი" (2002), რ. ვაგნერის "ტრისტანი და იზოლდა" (2003). ა. მაჭავარიანის ოპერები: "ჰამლეტი", "მედეა"და სხვა.

მისი ხელმძღვანელობით ყოველწლიურად იმართებოდა ი. შტრაუსის გალა-კონცერტი. 2010 წლიდან თანამშრომლობს თურქეთის საპრეზიდენტო და იზმირის სახელმწიფო სიმფონიურ ორკესტრებთან.

2017 წელს მას მიენიჭა ევგენი მიქელაძის სახელობის ეროვნული სიმფონიური ორკესტრის საპატიო დირიჟორის წოდება.

ვახტანგ მაჭავარიანი იყო თბილისის ოპერისა და ბალეტის სახელმწიფო აკადემიური თეატრის მოწვეული დირიჟორი.

მან 2022 წელს სიმფონიური სურათი "მარიუპოლი" უკრაინაში განვითარებულ მოვლენებს მიუძღვნა. გამოცემულია მისი სადირიჟორო რეპერტუარის და მის მიერ შესრულებული საფორტეპიანო კომპოზიციების გრამფირფიტები და კომპაქტდისკები.

წყარო: ბიოგრაფიული ლექსიკონი