ირაკლი ღარიბაშვილმა დღეს გამართულ ბრიფინგზე, სადაც პოლიტიკიდან წასვლის შესახებ გააკეთა განცხადება, ირაკლი კობახიძესთან შესაძლო დაპირისპირების შესახებ დასმულ კითხვებს თავი აარიდა.

ჟურნალისტის კითხვაზე, რატომ არც ერთხელ არ ახსენა ბრიფინგზე ირაკლი კობახიძე, მაშინ როცა არაერთხელ გადაუხადა მადლობა ბიძინა ივანიშვილს და ჰქონდა თუ არა მასთან შეუთავსებლობა, ღარიბაშვილმა ასეთი პასუხი გასცა:

"ეს ჩვეულებრივი სპეკულაციებია. ჩემს განცხადებაში არ ჩავთვალე მიზანშეწონილად, ჩამომეთვალა ყველა ის ლიდერი, რომელიც ჩვენი გუნდის საპატიო ლიდერია და თანამებრძოლია. ნუ ეძებთ რაღაც სპეკულაციებს. არავითარი საფუძველი არ არსებობს. გუნდი არის ძალიან დიდი, ეს გუნდი შეკრა და ჩამოაყალიბა ჩვენი პარტიის დამფუძნებელმა. ყველა ის წარმატება, რომელსაც ჩვენმა პარტიამ მიაღწია, დაკავშირებულია ბატონ ბიძინა ივანიშვილთან", — განაცხადა ღარიბაშვილმა.

ამას გარდა, ირაკლი ღარიბაშვილმა "ტვ პირველის" ჟურნალისტს შენიშვნა მისცა, რომ ირაკლი კობახიძე მოიხსენიოს, როგორც პრემიერმინისტრი და არა მხოლოდ "ირაკლი კობახიძე".

"ირაკლი კობახიძე არის პრემიერ-მინისტრი. მას თავისი ხედვა აქვს. არ შეიძლება ასეთი კითხვების დასმა. ეს არის დამაკნინებელი კითხვები. თქვენ ეჭვქვეშ აყენებთ პრემიერ-მინისტრის მუშაობას. პრემიერ-მინისტრის საქმიანობა უნდა შეაფასოს ხალხმა პირველ რიგში და მე რატომ მეკითხებით. ჯერ ერთი, სულ ერთი წელია, რაც მუშაობს პრემიერ-მინისტრის თანამდებობაზე. გირჩევთ, მოიხსენიოთ იგი როგორც პრემიერმინისტრად და არა მხოლოდ ირაკლი კობახიძედ", — მიმართა ირაკლი ღარიბაშვილმა ჟურნალისტს.