ქეით ბლანშეტი, როგორც ჩანს, სამსახიობო კარიერის დასრულებაზე ფიქრობს. ორგზის ოსკაროსანი ავსტრალიელი მსახიობი უახლეს ინტერვიუში ამბობს, რომ თამაშის გარდა, ცხოვრებაში სხვა რაღაცებით დაკავებაც სურს.

"ყოველ ჯერზე, როცა ამას ვიძახი, ჩემი ოჯახის წევრები თვალებს აატრიალებენ ხოლმე, მაგრამ ასეც ვაპირებ", — ამბობს ბლანშეტი, — "სერიოზულად ვამბობ, რომ მსახიობობას თავს დავანებებ. უამრავი რაღაცაა, რისი გაკეთებაც ცხოვრებაში მინდა".

მსახიობი ასევე აღნიშნავს, რომ საზოგადოების ყურადღების ცენტრში ყოფნა მისთვის არცთუ სასიამოვნოა. მთელი ცხოვრებაა, ვცდილობ, არაკომფორტულ მდგომარეობაში ყოფნას შევეგუოო, ამატებს იგი.

"როცა გადაცემაში მიდიხარ სტუმრად, ან თუნდაც ახლა, შენს ადრე ნათქვამს გახსენებენ, ეს კი ძალიან ხმამაღლა ჟღერს ხოლმე. მე ასეთი ადამიანი არ ვარ", — აცხადებს კინოვარსკვლავი, — "დიდი ხანია, ვცდილობ, ფოტოს გადაღებისას კომფორტულად ვიგრძნო თავი — მოძრავ კადრებში უკეთ ვჩანვარ".

ინტერვიუში ბლანშეტმა ასევე გულწრფელად თქვა, ყოველთვის მოვლენებისგან შორს მყოფად აღვიქვამ საკუთარ თავს და ძალიან მიკვირს, როცა ჩემს ადგილს ვპოულობო.

"ახალ გარემოში ყოველთვის ცნობისმოყვარეობით შევდივარ, არ მაქვს მოლოდინი, რომ მიმიღებენ".

ფოტო: Wilson Webb

საკუთარ თავში რწმენის ნაკლებობის შესახებ ბლანშეტმა ცოტა ხნის წინაც ისაუბრა როტერდამის კინოფესტივალზე. მსახიობის თქმით, არასდროს ეგონა, თუკი კინოინდუსტრიაში შეძლებდა მუშაობას.

"ბედნიერი გახლდით იმით, რომ თეატრალური კარიერა მქონდა და არ მეგონა, თუკი ისეთი [კინოინდუსტრიისთვის შესაფერისი] გოგო ვიყავი", — აღიარებს მსახიობი, — "მაშინ ისეთი განწყობა იყო, რომ ქალებს კინოინდუსტრიაში 'მოქმედების ვადა' ჰქონდათ განსაზღვრული, ეკრანზე კი მხოლოდ კონკრეტული ტიპის ქალები ჩნდებოდნენ".

თუმცა, ქეითმა ერთდროულად დაამარცხა საკუთარი შიშებიც და კინოინდუსტრიის ტენდენციებიც. მსახიობის კარიერა უკვე სამ ათწლეულზე მეტს ითვლის.

ბლანშეტის ამ დროისთვის ბოლო ნამუშევარი ჯაშუშური თრილერი Black Bag-ია, რომელშიც იგი მაიკლ ფასბენდერთან ერთად მონაწილეობს.

თუ ფილმები შენი ცხოვრების განუყოფელი ნაწილია და მათი განხილვაც გიყვარს, შემოგვიერთდი ჯგუფში ერთი ფილმიც და...