უკრაინის პრეზიდენტი ვოლოდიმირ ზელენსკი 18 მარტს აშშ-ს პრეზიდენტ დონალდ ტრამპსა და რუსეთის პრეზიდენტ ვლადიმირ პუტინს შორის სატელეფონო საუბრიდან რამდენიმე საათში X-ზე ეხმაურება.

ვოლოდიმირ ზელენსკის ცნობით, სატელეფონო საუბრიდან მალევე, რუსებმა იერიში მიიტანეს სამოქალაქო ინფრასტრუქტურაზე, მათ შორის დაბომბეს საავადმყოფო სუმიში.

"ახლა [უკრაინის] ბევრ რეგიონში პირდაპირ ისმის სინამდვილეში რა უნდა რუსეთს. ჩვენს ცაში დაახლოებით 40 "შაჰედია" და ისმის საჰაერო თავდაცვის ხმა.

სამწუხაროდ, დარტყმები მიტანილია სწორედ სამოქალაქო ინფრასტრუქტურაზე. "შაჰედების" პირდაპირი დარტყმა სუმის საავადმყოფოზე, იერიშები დონეცკის ოლქის ქალაქებზე, ამჟამად კი მოიერიშე დრონები დაფრინავენ კიევის, ჟიტომირის, სუმის, ჩერნიგოვის, პოლტავის, ხარკოვის, კიროვოგრადის, დნეპროპეტროვსკის და ჩერკასის რეგიონების თავზე." — განაცხადა ზელენსკიმ.

ზელენსკის განცხადებაში ვკითხულობთ, რომ რუსეთის ასეთი იერიშები უკრაინის ენერგოსისტემას, ინფრასტრუქტურასაც ანგრევს და პუტინმა "ფაქტობრივად უარყო ცეცხლის სრულად შეწყვეტის წინადადება".

"სწორედ ასეთი ღამეების დროს რუსეთის თავდასხმები ანგრევს ჩვენს ენერგოსისტემას, ინფრასტრუქტურას და უკრაინელების ნორმალურ ცხოვრებას. და ის ფაქტი, რომ ეს ღამე გამონაკლისი არ ყოფილა, ცხადყოფს მშვიდობის დასამყარებლად რუსეთზე ზეწოლის აუცილებლობას.

დღეს პუტინმა ფაქტობრივად უარყო ცეცხლის სრულად შეწყვეტის წინადადება. სწორი იქნებოდა, რომ საპასუხოდ მსოფლიომაც უარყოს პუტინის ომის გაჭიანურების ნებისმიერი მცდელობა.

სანქციები რუსეთის წინააღმდეგ. დახმარება უკრაინას. თავისუფალი სამყაროს მოკავშირეების გაძლიერება და უსაფრთხოების გარანტიებზე მუშაობა. და მხოლოდ რუსეთის მიერ სამოქალაქო ინფრასტრუქტურაზე დარტყმების რეალური შეწყვეტით, რაც ომის დასრულების ნამდვილი სურვილის მტკიცებულება იქნება, შესაძლოა დაგვიახლოვდეს მშვიდობა," — წერს უკრაინის პრეზიდენტი, ვოლოდიმირ ზელენსკი X-ზე.

შეგახსენებთ, 18 მარტს აშშ-ს პრეზიდენტ დონალდ ტრამპსა და რუსეთის პრეზიდენტ ვლადიმირ პუტინს შორის სატელეფონო საუბარი შედგა, რომლის მიხედვითაც პუტინი დათანხმდა 30 დღით შეაჩეროს თავდასხმები უკრაინის ენერგეტიკულ და ინფრასტრუქტურულ, მაგრამ არა სამოქალაქო ობიექტებზე. დონალდ ტრამპი პუტინთან საუბარი "ძალიან კარგად და პროდუქტიულად" შეაფასა.