თბილისში რუსეთის მოქალაქე დააკავეს, რომელმაც ორთაჭალაში, საცხოვრებელი კომპლექსი "მონოლითის" ტერიტორიაზე კაფეში მსხდომებს აივნიდან გადმოაშარდა.

News.On.ge-ს შსს-ში უთხრეს, რომ რუსეთის მოქალაქის საქმეზე სამართალწარმოება ადმინისტრაციულ სამართალდარღვევათა კოდექსის 166-ე და 171-ე მუხლებით მიმდინარეობს.

"ტვ პირველი" თვითმხილველებზე დაყრდნობით ავრცელებს ინფორმაციას იმის შესახებ, რომ გადმოშარდვის შემდეგ კაცმა თქვა, რომ "სააბაზანო ოთახი დაკავებული იყო და სხვა გზა არ ჰქონდა". პარალელურად კი, ფაქტის შემსწრე მოქალაქეების ცნობით, აივნიდან იძახდა - "დიდება რუსეთს".

"ვიჯექი კაფეში, რომელიც არის კორპუსის ქვემოთ, ვსვამდი ყავას, ჩემთვის მშვიდად და ვგრძნობ, რომ ზემოდან რაღაცა ისხმება. ავდექი და ავიხედე ზევით და დავინახე მამაკაცი, რომელიც შარდავდა აივნიდან.

როგორც კი ვიდეოს გადაღება ვცადე, ეგრევე დამინახა და შევარდა შიგნით. მე დავრეკე 112-ში, გამოვიძახე საპატრულო ეკიპაჟი, იმიტომ რომ ასეთი რამ არასდროს მინახავს და გამიგია. რომ ვუთხარი, რას აკეთებდი, ხალხს აშარდავდი-მეთქი და ასეთი პასუხი გამცა: "სლავა რასიი!", — ამბობს თვითმხილველი "ტვ პირველთან" საუბრისას.

აღნიშნული მუხლი გულისხმობს: საზოგადოებრივ ადგილებში ადამიანის ღირსებისა და საზოგადოებრივი ზნეობის შეურაცხმყოფელი ქმედების განხორციელებას, რაც გამოიხატება საზოგადოებაში მიღებული ქცევის წესების აშკარა უპატივცემულობით და იწვევს ადამიანისთვის დამამცირებელი ან შეურაცხმყოფელი გარემოს შექმნას.