ერევანში პროექტი "პუტინის გზა" განიხილეს, რომელიც ოკუპირებული აფხაზეთის გავლით რუსეთს, საქართველოსა და სომხეთს შორის სატრანსპორტო კავშირების განბლოკვას და აღდგენას გულისხმობს.

საუბარია რუსეთსა და სომხეთს შორის პირდაპირი სახმელეთო კავშირის შექმნაზე. შემდეგ კონცეფცია მარშრუტის უფრო ფართო რეგიონულ ქსელში ჩართვას და ირანთან დაკავშირებასაც ითვალისწინებს. როგორც ექსპერტები აღნიშნავენ, ეს გულისხმობს აფხაზეთის გავლით სარკინიგზო კავშირის აღდგენის შესაძლებლობასაც.

რუსული სახელმწიფო საინფორმაციო სააგენტო "რია ნოვოსტისთან" საუბრისას ერევნის სახელმწიფო უნივერსიტეტის რუსეთის კვლევების ცენტრის დირექტორი არამ საფარიანი აცხადებს, რომ აღნიშნული პროექტი ექსპერტულ და პოლიტიკურ წრეებში აქტიურად განიხილება.

აღნიშნული ინიციატივა კომუნიკაციების განვითარების ეროვნული კვლევითი ინსტიტუტის (კგეკი) დირექტორმა ვლადისლავ გასუმიანოვმა წარადგინა და მისი პრეზენტაცია 2026 წლის მაისში გაიმართა. ორშაბათს ინიციატივა ერევანში გამართულ საერთაშორისო საექსპერტო კონფერენციაზე — "სამხრეთ კავკასიის სატრანსპორტო-ლოგისტიკური ქსელების განვითარების პერსპექტივები" — განიხილეს.

ღონისძიებაში მონაწილეობდნენ კგეკი-ის, ერევნის სახელმწიფო უნივერსიტეტის რუსეთის კვლევების ცენტრისა და ერევნის სახელმწიფო უნივერსიტეტის სომხეთმცოდნეობის ინსტიტუტის სომხეთ-რუსეთის ურთიერთობების კვლევის განყოფილების წარმომადგენლები.

"დღეს სამხრეთ კავკასიის სატრანსპორტო მომავლის, თანამედროვე რეალობაში სატრანსპორტო-ლოგისტიკური ქსელების შესახებ ძალიან მნიშვნელოვანი განხილვა გავმართეთ. ამ განხილვის მიზეზი იყო ე.წ. "პუტინის გზა" — გეგმა, რომელიც ჩვენმა კოლეგამ, ვლადისლავ გასუმიანოვმა წამოაყენა. მის წინადადებას, რომელიც შავი ზღვის სანაპიროს გავლით რუსეთს, საქართველოსა და სომხეთს შორის სატრანსპორტო კავშირების განბლოკვასა და აღდგენას გულისხმობს, რუსეთში გამოხმაურება მოჰყვა", — განაცხადა საფარიანმა.

მისი თქმით, ამ მარშრუტზე საუბარი 2016 წელსაც მიმდინარეობდა, თუმცა "ცხოვრება სრულიად სხვა გზით წავიდა და ეს საკითხი დავიწყებას მიეცა".

"ახლა ამ საკითხის განხილვა კვლავ დაიწყო როგორც ექსპერტულ, ისე პოლიტიკურ წრეებში. თუმცა ვლადისლავ გასუმიანოვის სიტყვებით ვიტყვი — საჭიროა ახალი, არაპოლიტიკური გადაწყვეტილებები", — დასძინა პოლიტოლოგმა.

ექსპერტის აზრით, აუცილებელია სამხრეთ კავკასიაში სატრანსპორტო კომუნიკაციების "დაკარგული ჯაჭვების" აღდგენა, რათა "ჩაიბას" ერთმანეთს ჩრდილოეთი-სამხრეთისა და აღმოსავლეთი-დასავლეთის სატრანსპორტო დერეფნები, რადგან "ეს გაამდიდრებს როგორც რუსეთს, ისე დასავლეთს, ევროკავშირს, ჩინეთსა და ჩვენს სამხრეთ მეზობლებს".