ინფრასტრუქტურის მინისტრის რევაზ სოხაძის განცხადებით, თბილისის 166-ე სკოლის მშენებლობის ტენდერი გაზაფხულზე გამოცხადდება. მისივე თქმით, სახელმწიფო სკოლის ახალი შენობის მშენებლობის ვადებთან დაკავშირებით სრულ პასუხისმგებლობს იღებს.

ამის შესახებ მინისტრმა დიდუბის გამგეობაში 166-ე სკოლის წარმომადგენლებს, სამხარაულის ექსპერტიზის ბიუროსა და განათლების სამინისტროს წარმომადგენლებს შორის შეხვედრის შემდეგ ისაუბრა.

"მათ ავუხსენით, რომ პროექტი უკვე მზადდება და ჩვენ ვფიქრობთ, რომ წლის ბოლოსთვის უკვე გვექნება გამზადებული, დასრულებული პროექტი და უკვე გაზაფხულზე შევძლებთ ახალი სკოლის მშენებლობის ტენდერის გამოცხადებას და სამუშაოებიც, სავარაუდოდ, გაზაფხულის მიწურულს დაიწყება.

ის მოცემულობა, რაც არის 166-ე სკოლასთან დაკავშირებით არის ის, რომ აქ უნდა აშენდეს ახალი სკოლა. მართალია, რომ პროცესი გაჭიანურდა, უკვე ორწელიწად-ნახევარია ეს პროცესი მიდის, თუმცა ჩვენ ის თარიღები, რომლებიც დავასახელეთ ამაზე პასუხისმგებლობას სრულად ვიღებთ", — განაცხადა რევაზ სოხაძემ.

ცნობისთვის, თბილისის 166-ე საჯარო სკოლასთან მასწავლებლებმა, მოსწავლეებმა და მშობლებმა შენობის რეაბილიტაციის მოთხოვნით აქცია გამართეს. აქციის მონაწილეების განცხადებით, უკვე სამი წელია მოსწავლეები სხვა სკოლაში დადიან. აქციის მთავარი მოთხოვნაა, არ დაინგრეს სკოლის შენობა და მას სრული რეაბილიტაცია დროულად ჩაუტარდეს.