18 მარტს აშშ-ს პრეზიდენტის, დონალდ ტრამპისა და რუსეთის პრეზიდენტის, ვლადიმერ პუტინის სატელეფონო საუბარს კრემლი ეხმაურება.

კრემლის განცხადებაში ნათქვამია, რომ ვლადიმირ პუტინმა და დონალდ ტრამპმა სატელეფონო საუბრისას გააგრძელეს აზრთა დეტალური და გულწრფელი გაცვლა უკრაინის გარშემო არსებულ ვითარებაზე. ლიდერებმა ურთიერთობის ნორმალიზების ორმხრივი ინტერესი გამოთქვეს.

• რაზე ისაუბრეს პუტინმა და ტრამპმა სატელეფონო საუბრისას?

საუბრის შემდეგ პუტინმა მხარი დაუჭირა ტრამპის იდეას რუსეთისა და უკრაინის მიერ ენერგეტიკულ ინფრასტრუქტურაზე თავდასხმებზე 30 დღით უარის თქმის შესახებ და როგორც კრემლი იუწყება, თავის სამხედროებს ამის ბრძანება უკვე გასცა.

მოლაპარაკებების კიდევ ერთი შედეგია რუსეთსა და უკრაინას შორის სამხედრო ტყვეების გაცვლის შესახებ შეთანხმება, რომელიც განხორციელდება ფორმულით 175-დან 175-ზე.

გარდა ამისა, რუსეთი კიევში 23 მძიმედ დაჭრილ უკრაინელ სამხედროს გადაიყვანს.

რუსული მედია წერს, რომ საუბარი ქვეყნების ლიდერები კურსკის რეგიონში დარჩენილი უკრაინის შეიარაღებული ძალების ქვედანაყოფების ბედსაც შეეხო.

"დონალდ ტრამპის ბოლო მოწოდებასთან დაკავშირებით, შეუნარცუნოს სიცოცხლე უკრაინელი სამხედროებს კურსკის რეგიონში, ვლადიმერ პუტინმა დაადასტურა, რომ რუსული მხარე მზად არის იხელმძღვანელოს ჰუმანიტარული მოსაზრებებით და ტყვედ ჩაბარების შემთხვევაში, გარანტიას იძლევა, რომ უკრაინული შეიარაღებული ძალების ჯარისკაცებს სიცოცხლე შეუნარჩუნდებათ და გარანტირებული ექნებათ ღირსეულ მოპყრობას რუსული კანონებისა და საერთაშორისო სამართლის შესაბამისად", — ნათქვამია განცხადებაში.

ამას გარდა, უკრაინაში "კონფლიქტის" მოგვარების მიზნით მხარეები შექმნიან ექსპერტთა ჯგუფებს.

პუტინმა და ტრამპმა ასევე განიხილეს ორი ქვეყნის თანამშრომლობა მსოფლიოს სხვა რეგიონებში, განსაკუთრებით ახლო აღმოსავლეთში და წითელი ზღვის რეგიონში, სადაც ამჟამად მიმდინარეობს აშშ-ს სამხედრო ოპერაცია ჰუთების წინააღმდეგ.

"ერთობლივი ძალისხმევა განხორციელდება კრიზისულ ზონებში სიტუაციის სტაბილიზაციისა და ბირთვული იარაღის გაუვრცელებლობისა და გლობალური უსაფრთხოების საკითხებზე თანამშრომლობის დასამყარებლად. ეს, თავის მხრივ, ხელს შეუწყობს რუსულ-ამერიკული ურთიერთობების საერთო ატმოსფეროს გაუმჯობესებას", — ნათქვამია კრემლის განცხადებაში.

ამას გარდა, კრემლი წერს, რომ რუსეთის პრეზიდენტმა გამოაცხადა" მზადყოფნა ითანამშრომლოს ამერიკელ პარტნიორებთან, რათა საფუძვლიანად გამოიკვლიოს კონფლიქტის მოგვარების მიღწევის შესაძლო გზები, რომელიც უნდა იყოს ყოვლისმომცველი, მდგრადი და გრძელვადიანი. და, რა თქმა უნდა, გავითვალისწინოთ უპირობო აუცილებლობა, რათა აღმოიფხვრას კრიზისის ძირითადი მიზეზები, რუსეთის ლეგიტიმური ინტერესები უსაფრთხოების სფეროში", — ნათქვამია კრემლის განცხადებაში.

ეს არის მეორე სატელეფონო საუბარი დონალდ ტრამპსა და ვლადიმერ პუტინს შორის მას შემდეგ, რაც დონალდ ტრამპი აშშ-ის პრეზიდენტი მეორედ გახდა. საუბარი ორ საათზე მეტხანს გაგრძელდა.

პუტინისა და ტრამპის წინა საუბარი 12 თებერვალს გაიმართა.

ამავე თემაზე:

პუტინი: თუ უკრაინელი ჯარისკაცები დაყრიან იარაღს და ტყვედ ჩაგვბარდებიან, მათ გარანტირებული ექნებათ სიცოცხლე

ტრამპი: მე დაჟინებით ვთხოვე პრეზიდენტ პუტინს, რომ უკრაინელ ჯარისკაცებს სიცოცხლე შეუნარჩუნოს

ვლადიმერ პუტინი: თანახმა ვართ ცეცხლის შეწყვეტაზე, მაგრამ არსებობს ნიუანსები

NBC: კრემლმა რუსეთ-უკრაინის სამშვიდობო მოლაპარაკებებში ტრამპის წარმომადგენლის, კიტ კელოგის მონაწილეობა არ ისურვა

პუტინის განცხადებით, უკრაინელებმა კურსკში უნდა გააკეთონ არჩევანი დანებებასა და სიკვდილს შორის