"ქართული ოცნება ამერიკული კანონის — "უცხოური აგენტების რეგისტრაციის შესახებ" — შემოღებას სამოქალაქო და მედია ორგანიზაციებზე ზედამხედველობისა და კონტროლის მოპოვების კონტექსტში განიხილავს, მიუხედავად იმისა, რომ FARA-ს გონივრული განმარტების პირობებში, ასეთი ორგანიზაციები კანონის რეგულირების ფარგლებს მიღმა უნდა დარჩნენ, - ამის შესახებ სოციალური სამართლიანობის ცენტრის მიერ გავრცელებულ ინფორმაციაში ვკითხულობთ.

SJC წერს, რომ 1938 წელს FARA-ს მიღების კონტექსტი, ევოლუცია და მისი გამოყენების ადმინისტრაციული და სასამართლო პრაქტიკა აჩვენებს, რომ FARA არა ავტონომიური საზოგადოებრივი და მედია ორგანიზაციების დაფინანსების წყაროების გამჭვირვალობას, არამედ მტრულად განწყობილი უცხო ქვეყნის ძალების აგენტების საქმიანობას არეგულირებს.

ამ ორგანიზაციებს FARA-ს "აგენტის" დეფინიცია ვერ მოერგება, რადგან ისინი დაფინანსების მრავალფეროვანი წყაროების გამო ვერ აკმაყოფილებენ კანონის ერთ-ერთ კრიტერიუმს — რომელიმე წყაროდან სრულად ან დიდწილად დაფინანსებას. ამის მაგალითია ისიც, რომ 2023 წლის მონაცემებით, აშშ-ში FARA-ს ფარგლებში რეგისტრირებული არაკომერციული იურიდიული პირების წილი 5%-ზე ნაკლებია.

გარდა ამისა, 1960-იანი წლებიდან კანონი პრაქტიკულად არ გამოიყენებოდა: 1966-2015 წლებში იუსტიციის დეპარტამენტმა მხოლოდ 7 კრიმინალური საქმე აღძრა FARA-ს საფუძველზე. კანონის აქტუალობა კი 2016 წელს, ამერიკის არჩევნებში რუსეთის ჩარევის შემდეგ გაიზარდა.

FARA-ს მსუსხავ ეფექტსა და განჭვრეტადობაზე აშშ-ის უზენაეს სასამართლოს მსჯელობა არასდროს მოუწია, რაც განპირობებულია: 1) 1960-2016 წლებში კანონის ფაქტობრივად შეუსრულებლობით; 2) მისი ვიწრო რეგულირების სფეროთი და მიზნებით; 3) დამოუკიდებელი სასამართლო სისტემით; 4) გამოხატვის თავისუფლებისადმი პოლიტიკური და სამართლებრივი კონსენსუსით. საქართველოში კი, პირიქით, FARA-ს მტრულად განწყობილი პოლიტიკური გარემო, "მიტაცებული" სასამართლო და გამოხატვისა და გაერთიანების თავისუფლებისგან დაცლილი სისტემა ხვდება", — წერს SJC.

"ოცნების" პარლამენტმა Fara-ს კანონპროექტი გამოაქვეყნა — რა წერია ამერიკულ კანონში?

მდინარაძე: კატასტროფულად მკაცრი კანონი [FARA] რო დავაანონსეთ ახლა, ამაზე ხმას არ იღებენ და გაცილებით მსუბუქი კანონის მიღებაზე ჩამოაქციეს საქართველო

ირაკლი კობახიძე: იმედი მინდა გამოვთქვა, რომ პარლამენტში ამერიკული "ფარას" კანონი დაიხვეწება, ვინაიდან ეს არის საკმაოდ უხეში კანონი

შესაძლოა, FARA-ს აღსრულებას საქართველოში ანტიკორუფციულმა ბიურომ უხელმძღვანელოს