საიას თავმჯდომარე ნონა ქურდოვანიძე, საპროტესტო აქციებში მონაწილე მოქალაქეების მასობრივ დაჯარიმებებს ფეისბუქზე გამოეხმაურა.

ქურდოვანიძის თქმით, 5000-ლარიანი ჯარიმა 19-ჯერ აღემატება საარსებო მინიმუმს — რაც სისხლისსამართლებრივ დასჯას უთანაბრდება და არაპროპორციულია.

"იმ შემთხვევაშიც კი, თუ კანონი ფორმალურად ირღვევა, არაძალადობრივი ქცევა/პროტესტი სისხლისსამართლებრივ დასჯას არ უნდა დაექვემდებაროს.

5000-ლარიანი სანქცია, ანუ 19-ჯერ მეტი, ვიდრე საარსებო მინიმუმია, სისხლისსამართლებრივ დასჯას უთანაბრდება და აშკარად არაპროპორციულია.

ამ პრინციპების შესახებ ძალიან კარგად იცის ყველა მოსამართლემ და ამ არაადამიანური სამართალდარღვევათა კოდექსის პირობებშიც შეუძლიათ გამოსავლის პოვნა და ამ დასჯის არგამოყენება.

თუმცა, ამ საქმის განმხილველი მოსამართლეები მოსამართლის მანტიას ტყუილად ატარებენ და ყოველ დღე ასობით მოქალაქე საკუთარი გამოცდილებით რწმუნდება, რომ სასამართლო არ არსებობს," — წერს ნონა ქურდოვანიძე.

ქურდოვანიძეს თქმით, სამართლებრივი დახმარების ქსელის ცხელი ხაზზე ერთ დღეში 150-მდე ზარი შევიდა. ზარებიდან თითქმის ყველა გზის გადაკეტვის გამო დაჯარიმებას ეხებოდა — რაც დაახლოებით 750 000 ლარის ღირებულების ჯარიმაა მხოლოდ ერთ დღეზე.

შეგახსენებთ, გზის გადაკეტვის შემთხვევაში სადამსჯელო ზომები ითვალისწინებს ჯარიმას 5 000 ლარის ოდენობით ან ადმინისტრაციულ პატიმრობას 15 დღემდე ვადით. ცალკეული მოქალაქეები დღეში ორ-სამჯერაც კი მისდით დაჯარიმების შესახებ შეტყობინება.