აშშ-ს და დიდი ბრიტანეთის მიერ სანქცირებული ოცნების ხელისუფლების შინაგან საქმეთა მინისტრი ვახტანგ გომელაური საქართველოში თურქეთის რესპუბლიკის საგანგებო და სრულუფლებიან ელჩ ალი ქაან ორბაის შეხვდა.

შეხვედრის ფარგლებში ელჩმა მინისტრს თურქეთის რესპუბლიკის საელჩოს ახლად დანიშნული მრჩევლები შინაგან საქმეთა საკითხებში — ჰაქან ბეჯელი და ნეჯმეთინ თეთიკი წარუდგინა. ვახტანგ გომელაურმა ახლად დანიშნულ მრჩევლებს თანამდებობაზე დანიშვნა მიულოცა და სამომავლო საქმიანობაში წარმატება უსურვა.

ვახტანგ გომელაურმა ელჩს მადლობა გადაუხადა თურქეთის რესპუბლიკის სამართალდამცავ ორგანოებთან არსებული ინტენსიური და ნაყოფიერი თანამშრომლობისა და თურქული მხარის უწყვეტი მხარდაჭერისთვის საქართველოს შინაგან საქმეთა სამინისტროს შესაძლებლობების განვითარების პროცესში.

შეხვედრაზე ასევე ხაზი გაესვა თურქეთის ჩართულობას ნატო-საქართველოს არსებითი პაკეტის საზღვაო უსაფრთხოების ინიციატივის განხორციელების პროცესში. ვახტანგ გომელაურმა მადლიერება გამოხატა თურქული მხარის ინიციატივაზე NATO-ს საზღვაო უსაფრთხოების ოპერაციაში "ზღვის მცველი" ჩართულ თურქეთის რესპუბლიკის სამხედრო — საზღვაო ძალების ხომალდებზე ქართული კონტინგენტის განთავსების შესახებ.

შეხვედრის დასასრულს, მხარეებმა აღნიშნეს, რომ აქტიურად გაგრძელდება უწყებებს შორის დაგეგმილი შეხვედრებისა და სამუშაო ვიზიტების განხორციელების ტენდენცია, რაც ხელს შეუწყობს მხარეთა შორის სხვადასხვა მიმართულებით არსებული გამოცდილებისა და საუკეთესო პრაქტიკის გაზიარებას.

შეგახსენებთ, რომ 2024 წლის 19 დეკემბერს აშშ-მა შინაგან საქმეთა მინისტრს, ვახტანგ გომელაურსა და სპეცრაზმის უფროსის (ზვიად ხარაზიშვილის "ხარებას") მოადგილე მირზა კეზევაძე "მაგნიცკის აქტით" დაასანქცირა.

ამავე დღესვე დაასანქცირა გომელაური დიდმა ბრიტანეთმა. მის გარდა გაერთიანებული სამეფოს სანქციები შეეხო — შს მინისტრის მოადგილე ალექსანდრე დარახველიძეს, თბილისის პოლიციის დეპარტამენტის უფროს სულხან თამაზაშვილს, განსაკუთრებულ დავალებათა დეპარტამენტის უფროს ზვიად ხარაზიშვილს ("ხარება") და მისი მოადგილე მილერი ლაგაზაურს.