"საზოგადოებრივი მაუწყებელი უბრალოდ კერძო ტელევიზია და კერძო კომპანია არ არის, რომ ვიღაცის უშუალო გადაწყვეტილებით რაღაცა მოხდეს. აქ ყველაფერს კანონი არეგულირებს და მე ვაპირებ, განმარტება მოვითხოვო", — ამის შესახებ ვასილ ივანოვ-ჩიქოვანმა რადიო თავისუფლებასთან ინტერვიუში თქვა. ის საზოგადოებრივი მაუწყებლის ხელმძღვანელობამ სამსახურიდან მზია ამაღლობელის სოლიდარობისა და არხის კრიტიკის გამო გაათავისუფლა.

"საზოგადოებრივი მაუწყებელი უბრალოდ კერძო ტელევიზია და კერძო კომპანია არ არის, რომ ვიღაცის უშუალო გადაწყვეტილებით რაღაცა მოხდეს. აქ ყველაფერს კანონი არეგულირებს და მე ვაპირებ, განმარტება მოვითხოვო. ასეთი პრეცედენტი აქამდე არ ყოფილა. ჩვენ კანონს ვექვემდებარებით და ყველა თანამშრომელთან ყველაფერი კანონის შესაბამისად რეგულირდება. ამის გამოთხოვას აუცილებლად ვაპირებ, რა ნორმებით მოხდა ეს ყველაფერი", — განაცხადა ვასილ ივანოვ-ჩიქოვანმა.

ის საზოგადოებრივი მაუწყებლის ხელმძღვანელობამ სამსახურიდან მზია ამაღლობელის სოლიდარობისა და არხის კრიტიკის გამო გაათავისუფლა.

სოციალურ ქსელში "მოამბის" უკვე ყოფილმა წამყვანმა დაწერა, რომ მენეჯმენტმა აცნობა, რომ 4 თებერვლიდან, "არსებული გართულებული ვითარების ნორმალიზებამდე, დროებით აღარ დაევალება საინფორმაციო გამოშვება მოამბეს წამყვანის ფუნქციის შესრულების ვალდებულება".

"მე აღარ მიმყავს მოამბე 18:00 საათზე.

ოფიციალური პოზიცია —

"როგორც თქვენთვის ცნობილია, დღეს გამართულ სამეურვეო საბჭოს სხდომაზე "მოამბის" პროდიუსერებმა, თქვენს მიერ საჯაროდ (მათ შორის ეთერში) გაკეთებულ განცხადებებთან დაკავშირებით, დააფიქსირეს საკუთარი პოზიცია და თქვენთან, როგორც "მოამბე"-ს წამყვანთან, მუშაობის გაგრძელებაზე განაცხადეს უარი.

აღნიშნული გარემოების გათვალისწინებით, თანამშრომელთა შორის არსებული და შესაძლო სამომავლო დისკომფორტის, დაძაბული და არაჯანსაღი სამუშაო გარემოს შექმნის/გაუარესების საფრთხის თავიდან აცილების, ასევე მაუწყებლის კანონისმიერი ვალდებულებების შესრულების უზრუნველყოფის მიზნით, გაცნობებთ, რომ მიმდინარე წლის 4 თებერვლიდან, არსებული გართულებული ვითარების ნორმალიზებამდე, დროებით აღარ დაგევალებათ საინფორმაციო გამოშვება "მოამბე"-ს წამყვანის ფუნქციის შესრულების ვალდებულება", — დაწერა ვასილ ივანოვ-ჩიქოვანმა Facebook-ზე და ის წერილი გამოაქვეყნა, რომელიც მენეჯმენტისგან მიიღო.

5 თებერვალს "ევროპის ჟურნალისტთა ფედერაციამ" (EFJ) მხარდაჭერა გამოუცხადა საზოგადოებრივი მაუწყებლის ჟურნალისტს, ვასილ ივანოვ ჩიქოვანს და საზმაუს მისი სამსახურში აღდგენისკენ მოუწოდა.

"თუ უსამართლოდ სანქცირებულ ჟურნალისტს [ვასილ ივანოვ-ჩიქოვანს] დაუყოვნებლივ არ აღადგენენ სამსახურში, საზოგადოებრივი მაუწყებელი უნდა გაირიცხოს ევროპის მაუწყებელთა კავშირიდან (EBU)", — ნათქვამია "ევროპის ჟურნალისტთა ფედერაციის" (EFJ) მიერ დღეს გავრცელებულ წერილში.

ამავე დღეს, ვასილ ივანოვ-ჩიქოვანის ეთერიდან მოხსნას ახალგაზრდა იურისტთა ასოციაციაც გამოეხმაურა.

"ის, რომ ვასილ ივანოვ-ჩიქოვანი აღარ იქნება "მოამბის" წამყვანი, არის თავისუფალი სიტყვისა და ობიექტური ჟურნალისტიკის წინააღმდეგ მიმდინარე რეპრესია", — აცხადებს საია.