4 თებერვალს, ბრიტანელ ჟურნალისტ, პირს მორგანთან ინტერვიუში, უკრაინის პრეზიდენტმა, ვოლოდიმერ ზელენსკიმ უკრაინის ალტერნატიულ ნაბიჯებზე ისაუბრა. ზელენსკის თქმით, თუ აშშ მზად არაა უკრაინის NATO-ში მისაღებად, ქვეყანამ ალტერნატიული გარანტიები, მაგალითად, ბირთვული იარაღი უნდა მიიღოს.

"მოდით ასე მოვიქცეთ: [უკრაინას] ბირთვული იარაღი დაუბრუნდეს, სარაკეტო სისტემები მოგვეცეს, მილიონიანი არმიის დაფინანსებაში დაგვეხმარეთ, ან თქვენი კონტიგენტები განვათავსოთ ჩვენი ქვეყნის იმ ნაწილებში, სადაც გვინდა სტაბილურობა, რათა ხალხმა თავი დაცულად იგრძნოს", — თქვა ზელენსკიმ ინტერვიუში.

ზელენსკის ალტერნატიულ გარანტიებზე საუბარი მის მიერ "1994 წლის გადაწყვეტილების" კრიტიკას უკავშირდება. 1994 წელს, ბუდაპეშტის მემორანდუმის ფარგლებში უკრაინამ დათმო საბჭოთა კავშირის დროინდელი ბირთვული არსენალი, რომელიც ქვეყნის ტერიტორიაზე იყო განლაგებული და ბირთვული იარაღის გაუვრცელებლობის ხელშეკრულებას შეუერთდა .

უკრაინის პრეზიდენტმა ასევე კომენტარი გააკეთა იმაზე, რომ შეიძლება უკრაინის გაწევრიანება ალიანსში "წლობით ან ათობით წლით" გადაიდოს და ამის გამო ჩნდება კითხვები, შეძლებს თუ არა უკრაინა რუსეთის სამომავლო აგრესიიგან თავის დაცვას?

"პუტინი შემოიჭრა, რადგან მას ეშინოდა, რომ ჩვენ NATO-ს წევრი გავხდებოდით [რუსეთის არგუმენტი]. [ფაქტია], ჩვენ არ ვართ NATO-ს წევრი. მაშ, წადით ჩვენი მიწიდან," —განაცხადა ზელენსკიმ.

ზელენსკის თქმით, მიუხედავად იმისა, რომ დასავლეთს რუსეთის შესაჩერებლად უკრაინისთვის რაკეტების მიწოდება შეუძლია, რიტორიკულ კითხვად რჩება, შეუძლია თუ არა დასავლეთს რუსული ბირთვული იარაღის შეჩერება?