სახალხო დამცველის, უჩა ნანუაშვილის თქმით, ე.წ. ციანიდის საქმეზე სასამართლოს მიერ გამოტანილი გამამტყუნებელი განაჩენით მართლმსაჯულება არ აღსრულდა. ასე გამოეხმაურა სახალხო დამცველი დეკანოზისთვის ცხრაწლიანი პატიმრობის მისჯას.

ომბუდსმენის განცხადებით, შვიდთვიანი დაკვირვების შედეგად გამოვლინდა, რომ "გამოძიებისას გამოვლენილმა დარღვევებმა" სასამართლო განხილვაზე გავლენა იქონია:

"გამოძიების პირველი დღიდანვე უდანაშაულობის პრეზუმციისა და მხარეთა თანასწორობის უფლების დარღვევა მხოლოდ დასაწყისი აღმოჩნდა არაერთი ხარვეზისა, რომელთაც მოგვიანებით იჩინა თავი".

ნანუაშვილი მიიჩნევს, რომ კონფიდენციალური ინფორმაციის მოცულობის გათვალისწინებით სასამართლო სხდომის სრულად დახურვა საჭირო არ იყო. მისივე თქმით, თბილისის საქალაქო სასამართლომ დაცვის მხარეს აეროპორტში ბარგის ამოღებისა და დაკავების ამსახველი ვიდეომასალის მიღება შეუზღუდა.

"გაუგებარია, ვისი პერსონალური მონაცემების დაცვას ისახავდა მიზნად სასამართლო, როდესაც პროცესი მთლიანად დახურული იყო და ადვოკატებს გაუთქმელობის ხელწერილი ჰქონდათ დადებული".

ომბუდსმენის განცხადებით, ვიდეოჩანაწერის მოპოვება არც ბრალდების მხარემ უზრუნველყო, ასევე იყო "აცდენა" აეროპორტის თანამშრომლების ჩვენებებს შორის. მისივე თქმით, ციანიდის შეძენასთან დაკავშირებით გამოძიება ამ დრომდე "უშედეგოდ მიმდინარეობს":

"საგამოძიებო უწყებას ამ დრომდე არ მოუპოვებია ციანიდის შეძენის დამადასტურებელი მტკიცებულება. არ არის იდენტიფიცირებული პირი, ვისგანაც დეკანოზმა ნივთიერება შეიძინა."

ნანუაშვილი მიიჩნევს, რომ გაუგებარია თუ რატომ დაინიშნა ცეცხლსასროლ იარაღზე თავდაპირველად ფიზიკო-ტექნიკური ექსპერტიზა, რის შემდეგაც დაქტილოსკოპიური და გენეტიკური ექსპერტიზის ჩატარება შეუძლებელი იქნებოდა.

სახალხო დამცველის თქმით, ის გაეცნობა დასაბუთებულ განაჩენს და დეკანოზ გიორგი მამალაძის საქმის განხილვას შემდგომ ინსტანციებშიც დააკვირდება.

დღეს, 5 აგვისტოს თბილისის საქალაქო სასამართლომ დეკანოზი გიორგი მამალაძე შორენა თეთრუაშვილის განზრახ მკვლელობასა და იარაღის უკანონო შენახვა-ტარებისთვის ცხრაწლიანი პატიმრობა მიუსაჯა.

დეტალური განაჩენის ჩაბარების შემდეგ პროკურატურა მოტივის ნაწილში განაჩენის განაწილებას აპირებს.