დანია გრენლანდიის დაცვასა და არქტიკაში სამხედრო ძალების გაზრდაში 14.6 მილიარდი დანიური კრონის ინვესტირებას გეგმავს (2.05 მილიარდი დოლარი) — ამის შესახებ განცხადება ქვეყნის თავდაცვის მინისტრმა ტროელს ლუნდ პოულსენმა 27 იანვარს გააკეთა.

ინიციატივა კავშირშია აშშ-ის პრეზიდენტ დონალდ ტრამპის განცხადებებთან, რომლებშიც არაერთხელ გაისმა, რომ აშშ-ს დანიის ავტონომიური ტერიტორიის, გრენლანდიის, მიღება სურს.

მსოფლიოს უდიდესი კუნძული აშშ-ს, რუსეთსა და ევროკავშირს შორის მდებარეობს, მდიდარია მინერალური რესურსებით და სწორედ ამ ფაქტორების გამო მუდმივად იქცევს ისეთი ქვეყნების ყურადღებას, როგორებიც რუსეთი და ჩინეთი არიან.

დამატებით, გლობალურმა დათბობამ გრენლანდიის ყინულის დნობა დაიწყო, რაც ახალ საპორტო ადგილებს ქმნის და კუნძულს მისადგომად უფრო მარტივად აქცევს.

შეთანხმება დანიას, ფარერებსა და გრენლანდიას შორის

გრენლანდიის კაბინეტსა (ნაალაკერსუისუტი) და ფარერების მთავრობას შორის 27 იანვარს ხელი მოეწერა არქტიკისა და ჩრდილოატლანტიკურ პაკეტს, რომლის მიხედვითაც, გაძლიერდება სანაოსნო, სატელიტური და დრონებით დაკვირვება.

თანხებით უზრუნველყოფილი იქნება სამი ახალი გემი, შორ მანძილზე მოქმედი დრონები და სატელიტური შესაძლებლობები.

"ჩვენ უნდა შევეგუოთ ფაქტს, რომ არსებობს მნიშვნელოვანი გამოწვევები არქტიკისა და ჩრდილოატლანტიკის უსაფრთხოების მიმართულებით", — განაცხადა დანიის თავდაცვის მინისტრმა.

პოულსენმა განაცხადა ისიც, რომ შეთანხმება მოიცავს რეგიონში პარტნიორებისა და NATO-ს არქტიკული მისიების მხარდაჭერასაც.

განცხადებას პოზიტიურად შეხვდნენ როგორც დანიაში, ისე ფარერებსა და გრენლანდიაზე. კანონმდებლები შეთანხმდნენ, რომ დამატებითი დაფინანსების საკითხი მომდევნო თვეებში ისევ იქნება განხილული.