13 საერთაშორისო მედიაორგანიზაცია ერთობლივ განცხადებას ავრცელებენ და "ქართული ოცნების" ხელისუფლებას ჟურნალისტის, "ბათუმელებისა" და "ნეტგაზეთის" დამფუძნებლის მზია ამაღლობელის დაუყოვნებლივ გათავისუფლებისკენ მოუწოდებენ.

ორგანიზაციები ასევე მოითხოვენ ამაღლობელის მიმართ არასათანადო მოპყრობის შესახებ გამოძიების ჩატარებას.

"მოვუწოდებთ საქართველოს ხელისუფლებას, დაუყოვნებლივ და უპირობოდ გაათავისუფლოს მზია ამაღლობელი და დაასრულოს მედიის მიმართ ეს უპრეცედენტო დევნა. გარდა ამისა, ჩვენ ვითხოვთ ზედმიწევნით გამოძიებას მზია ამაღლობელის მიმართ არასათანადო მოპყრობის შესახებ", — ნათქვამია განცხადებაში.

განცხადებას ხელს 13 მედიაორგანიზაცია აწერს:

  • პრესის საერთაშორისო ინსტიტუტი (IPI)
  • პრესისა და მედიის თავისუფლების ევროპული ცენტრი (ECPMF)
  • ევროპის ჟურნალისტთა ფედერაცია (EFJ)
  • Osservatorio Balcani Caucaso Transeuropa (OBCT)
  • Free Press Unlimited (FPU)
  • იუსტიციის ფონდი ჟურნალისტებისთვის (JFJ)
  • IMS (საერთაშორისო მედია მხარდაჭერა)
  • მედია მრავალფეროვნების ინსტიტუტი (MDI)
  • მედია მრავალფეროვნების ინსტიტუტი დასავლეთ ბალკანეთში (MDI WB)
  • PEN International
  • სამოქალაქო უფლებების დამცველები (CRD)
  • ქეითი კილი, ლი ჰილსის თავმჯდომარე თავისუფალი პრესის კვლევებში, მისურის ჟურნალისტიკის სკოლა
  • ჟურნალისტთა საზოგადოება (ვარშავა)

ბათუმელების და ნეტგაზეთის დამფუძნებელი და დირექტორი, მზია ამაღლობელი 11-12 იანვარს ორჯერ დააკავეს. პირველად სტიკერის გაკვრისთვის, რომელსაც ეწერა: "იფიცება საქართველო 15 იანვარს 15:00 საათზე". მანამდე ამავე საბაბით აქციაზე დააკავეს კიდევ 9 ადამიანი. რამდენიმე საათში დაკავებულთაგან ოთხი — მზია ამაღლობელი, თეონა ბერიძე, ციალა ქათამიძე და ნანა შავაძე გაათავისუფლეს. მალევე აჭარის პოლიციის მთავარ სამმართველოსთან მოულოდნელად ჩოჩქოლი ატყდა და მზია ამაღლობელი მეორედაც დააკავეს ორ სხვა პირთან ერთად.

მას ბრალი სისხლის სამართლის კოდექსის 353-ე პრიმა მუხლის პირველი ნაწილით წარუდგინეს, რაც პოლიციელზე თავდასხმას გულისხმობს. მუხლი 4-დან 7 წლამდე პატიმრობას ითვალისწინებს