დღეს, 20 იანვარს, კაპიტოლიუმის შენობაში საპრეზიდენტო ფიცი მეორედ დადო დონალდ ტრამპმა, რის შემდეგაც ის აშშ-ს 47-ე პრეზიდენტი გახდა. მანამდე საზეიმო ფიცი დადო ვიცე-პრეზიდენტმა, ჯეი დი ვენსმაც.

ფიცის დადების შემდეგ, უკვე აშშ-ს პრეზიდენტის რანგში მიმართა ტრამპმა ხალხს და თქვა, რომ ამერიკის ოქროს ხანა იწყება. მან სიტყვით გამოსვლისას ყველა ის აქცენტი გააჟღერა, რაზეც საპრეზიდენტო კამპანიის განმავლობაში საუბრობდა, ახსენა მიგრანტების ქვეყნიდან გაძევება, "ომის დასრულება", თქვა, რომ მექსიკის ყურეს "ამერიკის ყურეს" დაარქმევენ, პანამის არხს დაიბრუნებენ, დაასრულებენ სოციალურ ექსპერიმენტებს და აშშ-ში არსებობს მხოლოდ ორი სქესი — მამრობითი და მდედრობითი.

"დღეიდან ჩვენი ქვეყანა კვლავ აყვავდება და მთელ მსოფლიოში პატივსაცემი გახდება. ჩვენი ყველა ქვეყანას შეშურდება და საკუთარ თავს უფლებას არ მივცემთ, რომ ჩვენით ბოროტად ისარგებლონ. ჩვენი მთავარი პრიორიტეტი ამაყი, აყვავებული და თავისუფალი ქვეყნის შექმნა იქნება. ამერიკა მალე უფრო დიდი, ძლიერი და გამორჩეული გახდება, ვიდრე ოდესმე", — განაცხადა დონალდ ტრამპმა.

სიტყვის გამოსვლისას ტრამპმა ისაუბრა საიმიგრაციო კანონის გამკაცრებაზეც და თქვა, რომ მისი გაპრეზიდენტების შემდეგ, ნებისმიერი არალეგალური შემოსვლა იქნება ადგილზე შეჩერებული და მილიონობით კრიმინალს გააძევებენ ქვეყნიდან.

"მე დღეს ხელს მოვაწერ ისტორიულ ბრძანებებს, რომელიც საფუძველს დაუდებს ამერიკის აღორძინებას და საღი აზროვნების დაბრუნებას. მე გამოვაცხადებ მნიშვნელოვან საკითხად ჩვენი საზღვრების დაცვას, ნებისმიერი არალეგალური შემოსვლა იქნება ადგილზე შეჩერებული და მილიონობით კრიმინალს გავაძევებთ ამ ქვეყნიდან. მე დავასრულებ ჩვენს ქვეყანაში არალეგალურ შემოსვლას", — თქვა აშშ-ს 47-ე პრეზიდენტმა.

პრეზიდენტ დონალდ ტრამპის თქმით, ის დღეს შეცვლის მექსიკის ყურის სახელს და მას "ამერიკის ყურეს" უწოდებს.

"ცოტა ხანში ჩვენ ვაპირებთ მექსიკის ყურეს სახელწოდება შევუცვალოთ და ამერიკის ყურე ვუწოდოთ," — თქვა ტრამპმა.

ამ ას გარდა, ტრამპმა განაცხადა, რომ აშშ-ს "პანამის არხი ჩინეთისთვის არ მიუციათ, ის პანამას მისცეს და უკან დაიბრუნებენ.

"პანამის არხს ჩინეთი აკონტროლებს და ჩვენ ის ჩინეთისთვის არ გადაგვიცია. ის პანამას გადავეცით და მას უკან ვიბრუნებთ," — აშშ-ს პრეზიდენტმა, დონალდ ტრამპმა ფიცის დადების შემდეგ.

აშშ-ს 47-ე პრეზიდენტმა ახსენა ომებიც, რომლებსაც დაასრულებენ და ომები, რომლებშიც არასდროს შევლენ. ამასთან, ტრამპმა პირობა დადო, რომ მშვიდობისმყოფელი იქნება, როგორც პრეზიდენტი.

"ჩვენ შევაფასებთ ჩვენს წარმატებას არა მხოლოდ იმ ბრძოლებით, რომლებსაც მოვიგებთ, არამედ იმ ომებითაც, რომლებსაც დავასრულებთ და, ალბათ, რაც მთავარია, ომებით, რომლებშიც არასდროს შევალთ. ჩემი ყველაზე საამაყო მემკვიდრეობა იქნება, ვიყო მშვიდობისმყოფელი და გამაერთიანებელი. სწორედ ეს მინდა ვიყო, მშვიდობისმყოფელი და გამაერთიანებელი", — აღნიშნა აშშ-ის პრეზიდენტმა, დონალდ ტრამპმა.

მან პირობა დადო, რომ დღეიდან აშშ-ის მთავრობის ოფიციალური პოლიტიკა იქნება, რომ არსებობს მხოლოდ ორი სქესი.

"ამ კვირაში მე ასევე დავასრულებ სამთავრობო პოლიტიკას, რომელიც ცდილობს რასისა და გენდერის ინჟინერირებას საჯარო და პირადი ცხოვრების ყველა ასპექტში.

დღეიდან, შეერთებული შტატების მთავრობის ოფიციალური პოლიტიკა იქნება, რომ არსებობს მხოლოდ ორი სქესი, მამრობითი და მდედრობითი", — განაცხადა მან.

მისივე თქმით, "ამერიკა დაიბრუნებს თავის კუთვნილ ადგილს, როგორც უდიდესი, ყველაზე ძლიერი, ყველაზე პატივსაცემი ერი დედამიწაზე — გამოიწვევს შიშს და აღფრთოვანებას მთელს მსოფლიოში".

კაპიტოლიუმის შენობაში აშშ-ის არჩეული პრეზიდენტის, დონალდ ტრამპის ინაუგურაციას 2 600-მდე ადამიანი დაესწრო. ფიცის დადების ცერემონია, კაპიტოლიუმის კიბეების ნაცვლად, კაპიტოლიუმის როტონდაში გაიმართა. ამის მიზეზი ვაშინგტონში ძლიერი ყინვა გახდა. კაპიტოლიუმის შენობაში ფიცის დადების ცერემონია უკანასკნელად 1985 წელს, რონალდ რეიგანის ინაუგურაციის დროს ჩატარდა.