სოლიდარობა გამოვუცხადე და კვლავ ვუცხადებ მზია ამაღლობელს. მივიჩნევ, რომ მისთვის შეფარდებული უმკაცრესი აღკვეთის ღონისძიება არაფრით არ იყო დასაბუთებული, — ამის შესახებ საზოგადოებრივი მაუწყებლის ჟურნალისტმა, ვასილ ივანოვ-ჩიქოვანმა საზოგადოებრივი მაუწყებელთან გამართულ მზია ამაღლობელის მხარდამჭერ აქციაზე განაცხადა.

ის ამბობს, რომ სოლიდარობა გამოუცხადა ბათუმში დაკავებულ ბათუმელებისა და ნეტგაზეთის დამფუძნებელსა და დირექტორს და კვლავ უცხადებს.

"სოლიდარობა გამოვუცხადე და კვლავ ვუცხადებ მზია ამაღლობელს. მივიჩნევ, რომ მისთვის შეფარდებული უმკაცრესი აღკვეთის ღონისძიება არაფრით არ იყო დასაბუთებული. არანაირი აუცილებლობა არ იდგა, არც პროკურატურის და არც სასამართლოს წინაშე, რომ შეფარდებულიყო ეს აღკვეთის ღონისძიება. შესაბამისად, მე მოქალაქეობრივი პოზიციაც დავაფიქსირე და როგორც კოლეგის მიმართ. გავბრაზდი ამის გამო და მივიჩნევ, რომ არ არის სამართლიანი და არც სამართლებრივი ის, რაც მოხდა მზია ამაღლობელთან დაკავშირებით", — განაცხადა ვასილ ივანოვ-ჩიქოვანმა.

"სოლიდარობა და თავისუფლება მზია ამაღლობელს", — უკვე მესამე დღეა, საზოგადოებრივი მაუწყებლის საინფორმაციო გამოშვებას, წამყვანი ვასილ ივანოვ-ჩიქოვანი ამ ფრაზით იწყებს. ამას გარდა, ის ბოლო პერიოდში აქტიურად აკრიტიკებს ს"პირველი არხის" სარედაქციო პოლიტიკას და ხალხისთვის ეთერის გახსნას ითხოვს.

"ვიდრე დღის მიმდინარე ახალ ამბებს გაგაცნობთ, შეგახსენებთ, რომ უწყვეტი საპროტესტო აქციების დაწყებიდან 49 დღე გავიდა. ამ დრომდე არავინ არის დასჯილი იმ შავ ფორმებში ჩაცმული პირებიდან, რომლებმაც აქციების დაშლისას სასტიკად იძალადეს მედიასა და მოქალაქეებზე. სოლიდარობა და თავისუფლება მზია ამაღლობელს." — ასე დაიწყო მოამბის საინფორმაციო გამოშვება საზოგადოებრივ მაუწყებელზე ვასილ ივანოვ-ჩიქოვანმა 15 იანვარს.