მასშტაბური ხანძარია რუსეთის ვორონეჟის ოლქის ლისკის რაიონში მდებარე ნავთობის ბაზაზე. ოლქის გუბერნატორ ალექსანდრ გუსევის ინფორმაციით, ხანძარი რამდენიმე უკრაინული დრონის "ჩამოვარდნამ" გამოიწვია.
პირველი ცნობა უპილოტო საფრენი აპარატებით შეტევის და ნავთობის ბაზაზე ხანძრის შესახებ გუსევის ტელეგრამ-არხზე 16 იანვარს, შუაღამის შემდეგ გამოქვეყნდა.

დილით გუბერნატორმა ტელეგრამზე დაწერა, რომ ღამის განმავლობაში ვორონეჟის ოლქის სამ რაიონს შეუტიეს 10-ზე მეტი დრონით, რომელთა "უდიდესი ნაწილი მოდის ლისკის რაიონში მდებარე ნავთობის ბაზაზე".

ვორონეჟის ოლქი რუსეთის იმ რეგიონებს შორისაა, სადაც უკრაინის თავდაცვის ძალები ხშირად უტევენ ნავთობგადამამუშავებელ ქარხნებს, ნავთობის ბაზებს და სამხედრო ობიექტებს.

რუსეთთან ომში მყოფ უკრაინას რუსეთის ტერიტორიაზე და ანექსირებულ ყირიმში კანონიერ სამიზნედ აქვს გამოცხადებული სამხედრო ობიექტები და საწარმოები, რომლებიც რუსული არმიის მომარაგებაზე მუშაობენ.