დღეს, 15 იანვარს, დოლიძის ქუჩაზე, უცხო პირთა გარკვეული ჯგუფი მოქალაქეებს თავს დაესხა. აღნიშნულ საკითხთან დაკავშირებით ვრცელდება ვიდეომასალა, სადაც ჩანს, ფიზიკურად როგორ უპირისპირდებიან უცნობი პირები აქციის მონაწილეებს.

ამასთან, გავრცელებული ინფორმაციით, დოლიძეზე მყოფ აქციის მონაწილეებს საცხოვრებელი კორპუსიდან კვერცხებიც დაუშინეს.

ცნობისთვის, საქართველოს მასშტაბით, დღეს, საყოველთაო გაფიცვა იმართება ლოზუნგით — "იფიცება საქართველო". აღნიშნულთან დაკავშირებით, მრავალი დამსაქმებელი და დასაქმებული გაიფიცა.

გაფიცვას, რომელიც 15:00 საათზე დაიწყო და სამი საათის განმავლობაში გაგრძელდება, უკვე შეუერთდნენ კომპანიები, კვების ობიექტები, უნივერსიტეტები თუ სხვა ბიზნესჯგუფები.

გაფიცული პირები ქუჩებში გამოვიდნენ, ხოლო მრავალი ობიექტი, გაფიცვის პერიოდში დაკეტილი რჩება.

პროტესტის მიზანია, აჩვენონ საზოგადოებას ის, თუ რა ელის საქართველოს იზოლაციის პირობებში.