მამაკაცმა, რომელმაც ამერიკელ რეპერ შონ "დიდი“ ქომბს სავარაუდო სექსუალური ძალადობის გამო უჩივლა, სამართლებრივი დავის შედეგად $100 მილიონი მიიღო, რადგან ქომბსმა სარჩელზე არ უპასუხა.

51 წლის დერიკ ლი კარდელო-სმიტმა დაადანაშაულა ქომბსი ნარკოტიკების მოხმარებაში და სექსუალურ ძალადობაში, ქომბსის ადვოკატებმა ბრალდებები უარყვეს.

ადგილობრივი გაზეთის ცნობით, კარდელო-სმიტი მსჯავრდებული დამნაშავეა, რომელიც ამჟამად პატიმრობას იხდის და სამოქალაქო სარჩელების წარდგენის ხანგრძლივი ისტორიითაა ცნობილი.

ქომბსის ადვოკატებმა განაცხადეს, რომ კარდელო-სმიტი "სასამართლოზე თაღლითობას“ სჩადის და BBC-ს განუცხადეს, რომ რეპერი ამ გადაწყვეტილებას გაასაჩივრებს.

ქომბსმა და მისმა ადვოკატებმა BBC-ს განუცხადეს, რომ მათ სარჩელის შესახებ არაფერი იცოდნენ, რადგან ქომბს ამის შესახებ სათანადოდ არ მიეწოდა ინფორმაცია.

მოსარჩელემ სასამართლოს განუცხადა, რომ ქომბსმა ცოტა ხნის წინ შესთავაზა 2.3 მილიონი დოლარი სარჩელის შეწყვეტის მიზნით, მაგრამ მან ეს შემოთავაზება არ მიიღო.

აღსანიშნავია, რომ რეპერის წინააღმდეგ აქამდეც შეუტანიათ სარჩელი სასამართლოში, სექსუალური და ფიზიკური ძალადობის ბრალდებით, ამ ადამიანებს შორისაა მისი დიდი ხნის პარტნიორი კასანდრა "კასი“ ვენტურა.

ქომბსმა ვენტურას გაურკვეველი თანხა გადაუხდა, რამაც საქმე სასამართლოს გარეთ მოაგვარა.

რეპერმა არაერთხელ უარყო ბრალდებები, მაგრამ მოგვიანებით ბოდიში მოიხადა მას შემდეგ, რაც 2016 წლის მაისში გამოქვეყნდა CCTV-ს კადრები, სადაც ჩანს, რომ ქომბსი ვენტურაზე ფიზიკურად ძალადობს.