კიევი აპირებს, რომ რუსეთი ოფიციალურად აგრესორ ქვეყნად გამოაცხადოს, წერს Ria. როგორც რადაში უკრაინის პრეზიდენტის წარმომადგენელი, ირინა ლუცენკო ამბობს, შესაბამისი პუნქტი დონბასის რეინტეგრაციის კანონპროექტში ჩაიწერება.

ლუცენკოს თქმით, დოკუმენტი თითქმის დასრულებულია და მზადაა პარლამენტში რეგისტრაციისთვის. მანვე აღნიშნა, რომ კანონპროექტის შემუშავებისას კიევმა კონსულტაციები ნორმანდიულ ოთხეულთან (გერმანია, საფრანგეთი, რუსეთი, უკრაინა) და აშშ-თან გაიარა:

"პირველად საკანონმდებლო დონეზე იქნება შეყვანილი განმარტება, რომ რუსეთი აგრესორი ქვეყანაა".

2015 წელს უმაღლესმა რადამ მიიღო განცხადება, რომლის მიხედვითაც რუსეთი აგრესორ ქვეყნად მიიჩნევა.

2014 წლის 18 მარტს რუსეთის ფედერაციამ უკრაინის კუთვნილი ყირიმი დაიპყრო. ყირიმის ნახევარკუნძული დე ფაქტოდ შეიყვანეს ფედერაციის შემადგენლობაში, როგორც ყირიმის ფედერალური ოლქი.