მეცნიერებმა ინდოეთის დასავლეთ გატის მთებში ბაყაყის ახალი სახეობა აღმოაჩინეს, რომელსაც ისინი ბჰუპატი-ის ალისფერ ბაყაყს ეძახიან. სახელი ინდოელი ჰერპეტოლოგის, დოქტორ ბჰუპატი სუბრამანიანის საპატივცემულოდ დაარქვეს, რომელიც 2014 წელს სამეცნიერო ექსპედიციის დროს გარდაიცვალა.

ახლად აღმოჩენილი ბაყაყის შესახებ სამეცნიერო სტატია ამერიკის ბუნების ისტორიის მუზეუმისა და უჯრედული და მოლეკულური ბიოლოგიის ცენტრის მიერ მომზადდა, რომელიც ჟურნალ Alytes-ში გამოქვეყნდა.

სამეცნიერო ნაშრომში ამფიბიის შესახებ ნათქვამია, რომ ახალი სახეობის ბაყაყს აქვს გლუვი ნაცრისფერი კანი იისფერი კოპლებით, პატარა ბუშტოვანი თვალები და ღორის მსგავსი ცხვირი. კვლევაში ასევე აღნიშნულია, რომ ბაყაყი თავისი ჯმუხი, სქელი "ხელების" გამო ძალიან ნელა გადაადგილდება.

ფოტო: ISSCA

ცნობილია, რომ ეს ბაყაყი დასავლეთ გატის მთებში, რომელიც ინდოეთის დასავლეთ სანაპიროზე მდებარეობს, მხოლოდ სამ სეზონს ცოცხლობს. National Geographic-ის ცნობით, ის მიწისქვეშ იკვებება კიდეც. დროის უმეტეს ნაწილს იისფერი ბაყაყი მიწისქვეშა სოროში ატარებს. სავარაუდოდ, სწორედ ამის გამო ჰგავს ის ამფიბიურ თხუნელას.

მეცნიერებს ამ ახალი სახეობის აღმოჩენა დიდ ძალისხმევად დაუჯდათ. იმისთვის, რათა დაემტკიცებინათ, რომ ამ სახეობის ბაყაყი მართლაც არავის ჰქონდა გამოკვლეული, რამდენიმე მოზრდილი ბაყაყისა და თავკომბალის შესწავლის შემდეგ, მეცნიერებმა გააკეთეს მორფოლოგიური, გენეტიკური და ბიოაკუსტიკური მონაცემების კომბინაცია.

აღმოჩნდა, რომ ბაყაყის ეს სახეობა დაკავშირებულია 2003 წელს აღმოჩენილ კიდევ ერთ უცნაურ სახეობასთან, რომელიც ცნობილია როგორც Nasikabatrachus sahyadrensis. ორივე მათგანი Nasikabatrachus-ის ოჯახს ეკუთვნის, თუმცა დნმ-ს ანალიზმა აჩვენა, რომ იისფერი ბაყაყები მართლაც სხვა სახეობას განეკუთვნებიან.