საქართველოში მიმდინარე პროევროპულმა აქციებმა ქვეყანა მოიცვა. საერთო მიზნით გაერთიანებული მოქალაქეები ერთმანეთის მიმართ სოლიდარობას, სიყვარულს და მზრუნველობას გამოხატავენ.

ამ დღეებში აქციებიდან ევროპული სამოქალაქო საზოგადოებისთვის დამახასიათებელი ამბები მოვისმინეთ, რომლებიც ისევ და ისევ გვარწმუნებს, რომ თავისუფლებისთვის მებრძოლი ქართველი ერის ადგილი ნამდვილად ევროპულ ოჯახშია.

გთავაზობთ მოქალაქე მარიკა პიტიურიშვილის მიერ ნაამბობ ერთ-ერთ თბილ ამბავს თბილისში მიმდინარე უწყვეტი დემონსტრაციიდან:

"ისე მჭიდროდ ვდგავართ ერთმანეთთან, ყველას საუბარი მესმის. ჩემ წინ ხელკავით მიდის წყვილი. ზურგიდან ვატყობ, საშუალო ასაკის იქნებიან. კაცი ეკითხება:
-ჩვენ წინ ბევრი ხალხია?
-კი, ბლომად.
- ხო, წინ დავდგეთ, რა იცი, როდის დაიწყებენ...
-თუ დაიწყეს, ჩვენ რა შეგვიძლია?
-ვინმეს ავეფარები, მე თვალები მაინც არ დამეწვება... და ორივე კვდება სიცილით...
გადავასწარი, შევხედე... კაცი უსინათლო იყო, ხელში ჯოხი ეჭირა და კაკუნით მიდიოდა, რომ წინმავალს არ დასჯახებოდა!
მიყვარხარ, ერო!"