დღეს, 14:00-ზე, მთავრობის ადმინისტრაციასთან შშმ პირებისა და მათთან დაახლოებული პირების, ასევე მათი უფლებადამცველების აქცია გაიმართა. ცნობისთვის, 3 დეკემბერს მსოფლიოს მასშტაბით შშმ პირთა დღე აღინიშნება. შეკრება არსებულ პროტესტთან გამოხმაურებისა და ევროინტეგრაციის მხარდაჭერის მიზნით შედგა.

აქცია რამდენიმე არასამთავრობო ორგანიზაციის თაოსნობით ჩატარდა. ესენია: საქართველოს დაუნის სინდრომის ასოციაცია, მოძრაობა ხელმისაწვდომი გარემო ყველასთვის, სოციალური სამართლიანობის ცენტრი, ოჯახები დისკრიმინაციის წინააღმდეგ და თემი ქედელი.

"ევროინტეგრაცია = შშმ პირთა დაცულ უფლებებს", — ვკითხულობთ ერთ-ერთი დემონსტრანტის პლაკატზე.

სხვები ამბობენ:

  • "შშმ პირები განსაკუთრებულ საფრთხეში ვართ";
  • "ევროპა უცხო ქვეყანაში არა, საქართველოში მინდა";
  • "ჩვენი მომავალი ევროკავშირში ინტეგრაციაზეა დამოკიდებული";
  • "ჩვენ ვიცავთ ჩვენი ქვეყნის ინტერესებს".

ცნობისთვის, შეკრებამდე ცოტა ხნით ადრე დაუნის სინდრომის ასოციაციამ განცხადება გამოაქვეყნა. ასოციაციამ მმართველი პარტიის არაკონსტიტუციური ქმედებები და ძალადობა დაგმო, შშმ პირთათვის ევროინტეგრაციის მნიშვნელობას გაუსვა ხაზი და მთავრობას კონსტიტუციის დაცვისაკენ მოუწოდა.