ქვეყანაში მიმდინარე აქტიური პროტესტის ფონზე თბილისის სახელმწიფო უნივერსიტეტში სასწავლო პროცესი არ წყდება. მეორე მხრივ, სტუდენტებს გაცდენები არ ჩაეთვლებათ და საშუალება ექნებათ, დაუსწრებელი საათები ინდივიდუალურად აღადგინონ.

უცვლელად გთავაზობთ შეტყობინებას, რომელიც თსუ-ს ადმინისტრაციამ სტუდენტებს სასწავლო პლატფორმაზე გაუგზავნა:

"უკანასკნელ დღეებში განვითარებული მოვლენებიდან გამომდინარე სტუდენტთა ნაწილმა გამოთქვა მოსაზრება უნივერსიტეტში სასწავლო პროცესთან შეჩერებასთან დაკავშირებით. უნივერსიტეტი პატივს სცემს და ითვალისწინებს თითოეული სტუდენტის შეხედულებას და გამოხატვის ფუნდამენტურ უფლებას. შესაბამისად, სტუდენტებს რომლებიც ვერ დაესწრებიან მიმდინარე ლექციებს და სხვა სასწავლო აქტივობებს, არ ჩაეთვლებათ გაცდენა და სასწავლო კომპონენტები ინდივიდუალურად აღუდგებათ სემესტრის დასრულებამდე. აქვე გვინდა აღვნიშნოთ, რომ ივანე ჯავახიშვილის სახელობის თბილისის სახელმწიფო უნივერსიტეტი ყოველთვის იყო, არის და იქნება ევროინტეგრაციის უპირობო მხარდამჭერი!"