თბილისში, პარლამენტის მიმდებარე ტერიტორიაზე მიმდინარე საპროტესტო აქციის პარალელურად, მასშტაბური აქცია იმართება ბათუმშიც.

პროტესტის მონაწილეთა ნაწილმა აჭარის საზოგადოებრივი მაუწყებლის შენობასთან გადაინაცვლეს და საეთერო დროს ითხოვენ — ვითარება დაძაბულია.

გუშინ თბილისში აქციის დაშლისას დაშავდა აჭარის ტელევიზიის ჟურნალისტი ნინო ლორჩოშვილი — ფაქტი ტელევიზიამ გამოაქვეყნა წარწერით, რომელშიც იკითხებოდა, რომ ის აქციის მონაწილეების მიერ გასროლილმა პიროტექნიკამ დააზიანა.

პოსტს საზოგადოებაში არაერთგვაროვანი გამოხმაურება მოჰყვა, დიდმა ნაწილმა მაუწყებელი გააკრიტიკა და პროსამთავრობო ნარატივის გავრცელებაში დაადანაშაულა.

საპასუხოდ, საზოგადოებრივი მაუწყებლის აჭარის ტელევიზიისა და რადიოს თანამშრომლების ნაწილმა გამოაქვეყნა წერილი, რომელშიც მიმდინარე მოვლენებს გამოეხმაურა.

"ხაზგასმით ვადასტურებთ უმთავრესი ღირებულებების ერთგულებას, რაც სახელმწიფო ჩარევისგან დამოუკიდებელ საზოგადოებრივ მაუწყებლობას, კრიტიკული კითხვების დასმას და ქვეყანაში მიმდინარე პროცესების ობიექტურად გაშუქებას გულისხმობს", — ვკითხულობთ განცხადებაში.