ილიაუნის სტუდენტები ბათუმელ სტუდენტებს მხარდაჭერას უცხადებენ და პროტესტის ნიშნად ილიაუნის A კორპუსში ღამის გათენებას აპირებენ.

"ილიაუნის სტუდენტები დღეს საღამოს 5 საათზე დაგეგმილი აქციის შემდეგ ვიკრიბებით ილიაუნის A კორპუსთან, მთელი ღამის განმავლობაში ვიქნებით ადგილზე, გავაპროტესტებთ გაყალბებულ არჩევნებს, უზურპირებულ ძალაუფლებას და საქართველოს მოქალაქეებისთვის წართმეულ ევროპულ არჩევანს. როგორც იცით, ილიაუნი ყოველთვის იქ დგას სადაც საქართველოს სჭირდება ამის გამო მას უსამართლოდ მიანიჭეს დროებითი აკრედიტაცია და როგორც სტუდენტები, ვგმობთ ამ გადაწყვეტილებასაც. გელოდებით ყველა ილიაუნელებს დღეს საღამოს 5 საათზე დაგეგმილი აქციის შემდეგ ილიაუნის A კორპუსთან, ერთად გავათენოთ საქართველოსთვის", — განაცხადა ილიას სახელმწიფო უნივერსიტეტის სტუდენტმა, ხალიბეგ მაგამედოვმა.

ახალგაზრდული სამოქალაქო მოძრაობები და ოპოზიციური პარტიების წარმომადგენლები აცხადებენ, რომ ბათუმის სახელმწიფო უნივერსიტეტის სტუდენტებს სრულ მხარდაჭერას უცხადებენ. მათი თქმით, 17:00 საათზე უერთდებიან ჯგუფი „დაიტოვეს” საპროტესტო მსვლელობას.

"თბილისიდან ვუცხადებთ სრულ მხარდაჭერას ბათუმელ თანამებრძოლებს, რომლებიც ბათუმის სახელმწიფო უნივერსიტეტში არიან და პროტესტს გამოხატავენ. ის ძალიან მაგარი ამბავი, რასაც ისინი აკეთებენ, დამატებითი იმედის და მუხტის მომცემია.
სწორედ ასეთი მტკიცე, მწყობრი, დაუღალავი, მშვიდობიანი პროტესტით შეგვიძლია მიზნის მიღწევა და ქვეყნის დაბრუნება, რომელიც დღეს ერთ პარტიას და ერთ ადამიანს აქვს მიტაცებული.
დღეს ასევე 17:00 საათზე არის ჯგუფი „დაიტოვეს“ მსვლელობა, რომელსაც ვუერთდებით, რადგან ქუჩის პროტესტი ძალიან მნიშვნელოვანია და ასევე სიახლეა, რომ ილიას სახელმწიფო უნივერსიტეტის სტუდენტები აპირებენ ბათუმელი სტუდენტებისთვის სოლიდარობის გამოხატვას“, — განაცხადა "მე-12 სართულის" წევრმა, ვადო მაჭავარიანმა.

სხვადასხვა უნივერსიტეტის სტუდენტები და აქტივისტები დღეს ილიაუნში და თსუ-ში მივიდნენ და სტუდენტებს მოუწოდეს, მათ პროტესტს შემოუერთდნენ. ისინი 17:00-ზე დაიტოვეს ორგანიზებულ მსვლელობაში მიიღებენ მონაწილეობას.

ბათუმში სტუდენტებმა ღამე გაათენეს ბსუ-ს შენობაში. მათ დღეს, 18:00 საათზე უნივერსიტეტის წინ აქცია დააანონსეს.