შეერთებულ შტატებში ბოლო საარჩევნო უბნები ჯერ კიდევ არ დახურულა და არც გადამწყვეტი მერყევი შტატების უმრავლესობაში დასრულებულა ხმების დათვლა, თუმცა, წინასწარი მონაცემებით, აშშ-ის არჩევნებში ტრამპი ლიდერობს.

დონალდ ტრამპმა კიდევ 2 მნიშვნელოვან შტატში ჩრდილოეთ კაროლინასა და ჯორჯიაში გაიმარჯვა. დემოკრატებს ჩრდილოეთ კაროლინაში საარჩევნო კოლეგიის ხმა 2008 წლის შემდეგ არ მიუღიათ. ტრამპმა ამ შტატში 2020 წელსაც გაიმარჯვა, თუმცა მხოლოდ მცირე სხვაობით. აღსანიშნავია, რომ ჯორჯიაში ტრამპმა 2020-ში წააგო.

აშშ-ს საარჩევნო რუკა

აშშ-ს საარჩევნო რუკა

ფოტო: AP

ბოლო მონაცემებით, ყოფილ პრეზიდენტს, რესპუბლიკელ დონალდ ტრამპს 247 ელექტორის ხმა აქვს. დემოკრატ ვიცე-პრეზიდენტ კამალა ჰარისს კი — 214. ამერიკის მომავალ პრეზიდენტს ჯამში 270 ელექტორის ხმის მოპოვება სჭირდება.

როგორც ამერიკის ხმა წერს, ამერიკის მომავალი პრეზიდენტის ბედი კვლავ გაურკვეველია, რადგან არიზონაში, ჯორჯიაში, მიჩიგანში, ნევადაში, უისკონსინში და პენსილვანიაში შედეგებს ჯერ კიდევ აჯამებენ. რესპუბლიკელმა დონალდ ტრამპმა შვიდი მერყევი შტატიდან ერთი უკვე მოიგო, ესაა ჩრდილოეთ კაროლინა. ის ელექტორთა ხმების რაოდენობით, კვლავ დამაჯერებლად ლიდერობს.

47-ე პრეზიდენტის გარდა, ამერიკელები ასევე ირჩევენ წარმომადგენელთა პალატის ყველა, 435-ივე წევრს, სენატში - 33 სენატორს, ჯამში - ქვეყნის 468 კანონმდებელს. ბიულეტენზე ბევრგან ადგილობრივი, შტატის თუ ქალაქის მთავრობათა და საკანონმდებლო ორგანოთა მნიშვნელოვანი პოსტებიცაა.

თუ გაინტერესებს მსოფლიოში მიმდინარე მნიშვნელოვანი ამბები, გაწევრიანდით ჯგუფში — რა ხდება მსოფლიოში