თამთა მიქელაძე: საერთაშორისო ორგანიზაციები სადიგოვს პოლიტიკურ პატიმრად მიიჩნევდნენ და მოუწოდებენ საქართველოს ხელისუფლებას მის გათავისუფლებასა და ექსტრადიციის აკრძალვას

დღეს თბილისის საქალაქო სასამართლოში, მოსამართლე არსენ კალატოზიშვილი აფგან სადიგოვის პატიმრობის საკითხს განიხილავს. აზერბაიჯანის მხარე ჟურნალისტს ერთ-ერთი ჩინოვნიკისგან 6000 მანათის გამოძალვას ედავება. საქმე ეხება ინციდენტს, სადაც ამ ჩინოვნიკმა საკუთარი დაბადების დღე "კანონიერი ქურდის" გამოსახულებიანი ტორტით აღნიშნა. ამის შესახებ სოციალურ ქსელში EMC-ის დამფუძნებელი, თამთა მიქელაძე წერს.

"აზერბაიჯანის გამოძიების მტკიცებით, სადიგოვმა აგვისტოში დაურეკა ჩინოვნიკს გამოძალვის მიზნით. თუმცა, ჩვენ დავადგინეთ, რომ ეს ვიდეომასალა ჯერ კიდევ ივლისში აქტიურად ვრცელდებოდა სოციალურ ქსელებში და მას უკვე მრავალი ადამიანი იცნობდა, რაც გამორიცხავს კომპრომატის რეალურ შესაძლებლობას.

სწორედ ამ აბსურდული ბრალდების საფუძველზე იმყოფება დღეს სადიგოვი ქართულ ციხეში — ადამიანი, რომელიც აზერბაიჯანში ორჯერ იყო პოლიტიკური დევნის მსხვერპლი. ყველა საერთაშორისო ორგანიზაცია მას მაშინაც პოლიტიკურ პატიმრად მიიჩნევდა და ახლაც მოუწოდებენ საქართველოს ხელისუფლებას მის გათავისუფლებასა და ექსტრადიციის აკრძალვას.

სადიგოვი უკვე 42 დღეა შიმშილობს ქართულ ციხეში. ის არის დასუსტებული და უმძიმეს მდგომარეობაშია", — წერს თამთა მიქელაძე.

დღევანდელ პროცესზე სადიგოვის მიმართ საექსტრადიციო პატიმრობის გაგრძელების შესახებ იმსჯელებენ. სხდომას ესწრება დაკავებული ჟურნალისტიც.

აზერბაიჯანელი ჟურნალისტი, აფგან სადიგოვი საქართველოში მიმდინარე წლის 3 აგვისტოს დააკავეს. მას თბილისის საქალაქო სასამართლოს გადაწყვეტილებით, 3-თვიანი საექსტრადიციო პატიმრობა აქვს შეფარდებული.