თემურ სუყაშვილი მარნეულში სადამკვირვებლო მისია "ხმის გუშაგის" მობილური ჯგუფის კოორდინატორი იყო. 26 ოქტომბერს, არჩევნების დღეს, ის 16 საარჩევნო უბანზე იმყოფებოდა. NEWS.On.ge-სთან საუბრისას სუყაშვილი ამბობს, რომ ჯგუფთან ერთად გაყალბების სავარაუდო მექანიზმი აღმოაჩინა.

"შემოდიოდნენ საქართველოს მოქალაქის პასპორტით, აწვდიდნენ რეგისტრატორს, რომელსაც შეჰყავდა ხელით პირადი ნომერი, რომელიც იყო არა უშუალოდ დოკუმენტზე, არამედ მასში იყო ჩადებული პატარა წებოვან ქაღალდებზე მიმაგრებული პირადი ნომრები, რომლებიც, რა თქმა უნდა, იმ უბანზე მიწერილ ამომრჩეველს გულისხმობდა. სავარაუდოდ, ეს ამომრჩევლები ან საზღვარგარეთ იმყოფებოდნენ, ან უბრალოდ იცოდნენ, რომ არ ცხადდებოდნენ არჩევნებზე. შეიძლება გარდაცვლილი პირებიც იყვნენ, ამას სჭირდება გადამოწმება", — გვიყვება სუყაშვილი.

2024 წლის 26 ოქტომბრის საპარლამენტო არჩევნები, საარჩევნო უბნების 90%-ში, ელექტრონული წესით მიმდინარეობდა. ამ პროცესში ტექნოლოგიების ჩართვამ მის მიმართ საფუძვლიანი ნდობა გააჩინა.

არჩევნების ელექტრონული სისტემა სამი ნაწილისგან შედგება, ესენია: ვერიფიკაციის აპარატი, ხმის მთვლელი აპარატი და პლანშეტი, რომელიც საარჩევნო პროცესის დასრულების შემდგომ მონაცემების გადასაგზავნად გამოიყენება.

პრობლემა, რომელზეც თემურ სუყაშვილი მიუთითებს ვერიფიკაციის აპარატს ეხება. მასში ამომრჩევლის პირადობის მოწმობა თავსდება, რითაც მისი იდენტობა დასტურდება. თუმცა ეს ვერ მოხდება პასპორტის შემთხვევაში... თუ მოქალაქე ხმის მისაცემად ID ბარათის ნაცვლად პასპორტს იყენებს, რეგისტრატორი მას ვეღარ ათავსებს აპარატში, ვერიფიკაციის მიზნით და პირადი ნომერი ხელით შეჰყავს.

დამკვირვებლის მტკიცებით, იმ საარჩევნო უბნებზე, სადაც თვითონ იმყოფებოდა, იყვნენ რეგისტრატორები, რომლებიც უშუალოდ ამ საქმეს ემსახურებოდნენ. ამ უბნებზე გაურკვეველი სადამკვირვებლო მისიის წარმომადგენლები ითავსებდნენ რიგის მომწესრიგებლის ფუნქციას და პასპორტიან მოქალაქეებს კონკრეტულ რეგისტრატორთან ამისამართებდნენ.

"გადაიღო ჩვენმა დამკვირვებელმა შემთხვევა, როცა პასპორტში არსებული პირადი ნომერი არ ემთხვევა იმ პიროვნებისას, რომელიც რეალურად საარჩევნო უბანზე იმყოფებოდა", — ამბობს თემურ სუყაშვილი.

მიუხედავად იმისა, რომ მარნეულის ოლქში წარსულშიც ხშირად იკვეთებოდა საარჩევნო დარღვევები, დამკვირვებლები აღნიშნავენ, რომ ამ არჩევნებზე მარნეულის უბნებზე არსებული სიტუაცია უპრეცედენტო იყო.

სუყაშვილი მარნეულში მასწავლებლად მუშობს და ბევრი იცნობს, სწორედ ამიტომ, მისი თქმით, საარჩევნო პროცესის მიმდინარეობისას მასთან მოლაპარაკება ბევრმა სცადა და კანონდარღვევაზე თვალის დახუჭვაც სთხოვეს:

"2013 წლიდან ვმუშაობ მარნეულში, მასწავლებელი ვარ და ყოველკვირეულად, დაახლოებით, 300-მდე მოსწავლესთან მაქვს შეხება. ადგილზე ძალიან ბევრს ვიცნობ. რამდენიმე უბანზე დაგვხვდნენ მშობლები, განსაკუთრებით გამოვყოფდი ყიზილაჯლოს 50-ე უბანს, სადაც ერთ-ერთი სადამკვირვებლო მისიის წარმომადგენელმა გვერდზე გამიყვანა და მითხრა, შენი მოსწავლეა ჩემი ორი შვილიო და მოდი, დაგვეხმარე, რასაც ვაკეთებთო. ამ კანონდარღვევაში ხელს ნუ შეგვიშლიო, ანუ. ამაზე ჩემი პასუხი იყო ის, რომ ორშაბათს, როდესაც მივალ სკოლაში რა თვალებით შევხედო შენს შვილებს, რომლებსაც ვასწავლი დემოკრატიულ ღირებულებებს; იმას, რომ არჩევნები არის დემოკრატიის ქვაკუთხედი".

სუყაშვილი აღნიშნავს, რომ არცერთი პარტიის წარმომადგენელი არაა და არც არასდროს ყოფილა ასოცირებული კონკრეტულ პოლიტიკურ ძალასთან. ის აღნიშნავს, რომ თითო უბანზე 20-25-კაციანი ჯგუფი გადაადგილდებოდა.

"ყველაზე მნიშვნელოვანი არის ის, რომ ეს პირები ერთსა და იმავე უბანზე რამდენჯერმე ცდილობდნენ შესვლას. ჩვენი დამკვირვებლის მიერ ჩაწერილ ვიდეოში ის ამბობს, რომ მეშვიდედ ცდილობს კონკრეტული ადამიანი შესვლას. ერთ უბანზე რომ შვიდჯერ შევიდა, რაღაც დროის მონაკვეთში, საკითხავია, სხვა უბნებზე რამდენჯერ იყო ის პიროვნება შესული?"