ნეტგაზეთის ცნობით, ახალგორის მკვიდრი და სამოქალაქო აქტივისტი თამარ მეარაყიშვილი ახალგორის პროკურატურის შენობაში დაიბარეს, სადაც ის ამჟამად იმყოფება. მეარაყიშვილი 2017 წლის 16 აგვისტოს სამხრეთ ოსეთის დე ფაქტო რესპუბლიკის მილიციამ დააკავა.

გამოცემა წერს, რომ უწყებაში დაბარების ოფიციალური მიზეზი მეარაყიშვილის მიერ დე ფაქტო რესპუბლიკის მმართველი პარტია ერთიანი ოსეთის პატივისა და ღირსების შელახვის საქმის ბრალდებას უკავშირდება, რაზეც აქტივისტი 2017 წლის 31 ივლისს იყო დაბარებული. საქმე შეეხებოდა რუსულენოვან გამოცემა ეხო კავკაზაზე გამოქვეყნებულ სტატიას, სადაც რესპონდენტი თამარ მეარაყიშვილი, ახალგორის [ლენინგორის] რაიონში ყოფილი პრეზიდენტის, ლეონიდ თიბილოვის დროს დანიშნული კადრების დათხოვნასა და ახალი პრეზიდენტის, ანატოლი ბიბილოვის მხარდამჭერთა თანამდებობებზე დანიშვნაზე საუბრობს.

ნეტგაზეთის ინფორმაციით, პარტიის სახელით მეარაყიშვილზე საჩივარი ახალგორის სატყეო სამსახურის ახალმა უფროსმა, სამხრეთ ოსეთის მმართველი პარტია ერთიანი ოსეთის წევრმა, სპარტაკ დრიაევმა შეიტანა.

თამარ მეარაყიშვილის დაკავებას სახალხო დამცველის აპარატიც გამოეხმაურა. ომბუდსმენი უჩა ნანუაშვილის თქმით, ეს ქმედება უნდა შეფასდეს, როგორც მისი იძულება სამუდამოდ დატოვოს ახალგორი.